Vijay Deverakonda: గూఢచారిగా విజయ్‌ దేవరకొండ

యువ కథానాయకుడు విజయ్‌ దేవరకొండ (Vijay Deverakonda) కొత్త సినిమా ఖరారైంది. ‘జెర్సీ’ (Jersey) ఫేమ్‌ గౌతమ్‌ తిన్ననూరి (Gowtam Tinnanuri) దర్శకత్వంలో ఆ సినిమా రూపొందనుంది. విజయ్‌ దేవరకొండ 12వ చిత్రమిది. ఫార్చూన్‌ ఫోర్‌ సినిమాస్‌తో కలిసి సితార ఎంటర్‌టైన్‌మెంట్స్‌ పతాకంపై సూర్యదేవర నాగవంశీ, సాయి సౌజన్య సంయుక్తంగా నిర్మిస్తున్నారు. శ్రీకర స్టూడియోస్‌ సమర్పిస్తోంది. సంక్రాంతి పండగని పురస్కరించుకుని శుక్రవారం ఈ కలయికలోని సినిమాని అధికారికంగా ప్రకటించింది చిత్రబృందం. ‘ఖుషి’ చిత్రంలో నటిస్తున్న విజయ్‌ దేవరకొండ... ‘లైగర్‌’ తర్వాత ఒప్పుకున్న చిత్రమిదే. ఇందులో విజయ్‌ ఓ అజ్ఞాత గూఢచారిగా కనిపించనున్నట్టు చిత్రబృందం విడుదల చేసిన కాన్సెప్ట్‌  పోస్టర్‌ని బట్టి స్పష్టమవుతోంది. ‘‘విజయ్‌ దేవరకొండ - గౌతమ్‌ తిన్ననూరి కలయికలో రూపొందుతున్న ఈ సినిమా అంచనాల్ని అధిగమించేలా ఉంటుంది. ఓ అద్భుతమైన విషయం ఇందులో ఉంటుంది’’ అన్నారు నిర్మాత సూర్యదేవర నాగవంశీ. ఈ చిత్రంతో విజయ్‌ నటనలోని ఓ కొత్త కోణాన్ని ఆవిష్కరిస్తానని దర్శకుడు చెప్పారు. త్వరలోనే చిత్రీకరణ ప్రారంభం కానుందని, త్వరలోనే ఇతర నటులు -  సాంకేతిక బృందం వివరాల్ని ప్రకటిస్తామని సినీ వర్గాలు వెల్లడించాయి.