Rajamouli: మహేశ్- రాజమౌళిల సినిమాలో ఆ తమిళహీరో ఉన్నారా..!

హైదరాబాద్‌: రాజమౌళి దర్శకత్వంలో మహేశ్‌బాబు హీరోగా ఓ సినిమా తెరకెక్కనున్న విషయం తెలిసిందే. ఈ సినిమా అప్‌డేట్స్‌ కోసం అటు రాజమౌళి అభిమానులు ఇటు మహేశ్‌ అభిమానులు ఎంతగానో ఎదురుచూస్తున్నారు. ఈ క్రేజీ కాంబినేషన్‌కు సంబంధించి ఏ చిన్న విషయం బయటకు వచ్చినా అది క్షణాల్లో వైరల్‌ అవుతోంది. తాజాగా ఈ సినిమా గురించి ఓ వార్త నెట్‌లో తెగ హల్‌చల్‌ చేస్తోంది. ఇటీవల ఈ చిత్రబృందం తమిళ నటుడు కార్తితో సంప్రదింపులు జరిపారని. సినిమాలోని  ఓ కీలకపాత్రలో కార్తి కనిపించనున్నారని టాక్‌. కార్తి కూడా ఆసక్తికనబరచినట్లు సమాచారం. అయితే ఈ విషయంపై అటు కార్తి కానీ, ఇటు చిత్రబృందం కానీ ఎలాంటి అధికారిక ప్రకటన చేయలేదు. ప్రపంచాన్ని చుట్టి వచ్చే సాహసికుడి కథగా రూపుదిద్దుకోనున్న ఈ సినిమా రాజమౌళి కెరీర్‌లోనే అతి పెద్ద చిత్రంగా ఉండబోతోంది. యాక్షన్‌ ప్రధానంగా సాగనున్న ఈ చిత్రం కోసం రాజమౌళి తండ్రి విజయేంద్రప్రసాద్‌ కథ అందిస్తున్నారు. పూర్తి స్క్రిప్టు సిద్ధమవకముందే ఎన్నో అంచనాలు పెంచేసిన ఈ సినిమాను పాన్‌ ఇండియా స్థాయిలో కె.ఎల్‌.నారాయణ నిర్మించనున్నారు. వచ్చే ఏడాది ఈ సినిమాకు సంబంధించిన పూర్తి వివరాలు అధికారికంగా తెలిసే అవకాశం ఉంది.