Andhra News: కుప్పంపై సీఎం జగన్‌ కక్ష కట్టారు: చంద్రబాబు

కుప్పం: పెట్రోల్‌, డీజిల్‌ ధరలు ఏపీలోనే ఎక్కువని.. పక్క రాష్ట్రాలకు వెళ్లి పెట్రోల్‌, డీజిల్‌ తెచ్చుకోవాల్సిన పరిస్థితి వచ్చిందని తెదేపా అధినేత చంద్రబాబు అసహనం వ్యక్తం చేశారు. కుప్పం నియోజకవర్గంలో పర్యటిస్తున్న చంద్రబాబు.. రాష్ట్ర ప్రభుత్వ తీరుపై విమర్శలు గుప్పించారు. కుప్పంపై రాష్ట్ర ముఖ్యమంత్రి జగన్‌ కక్ష కట్టారని విమర్శించారు. నియోజకవర్గంలో పంట నష్టపోయిన రైతులను పట్టించుకునేవారు లేకుండా పోయారని ఆవేదన వ్యక్తం చేశారు.

ప్రశ్నా పత్రాల లీకేజీ వ్యవహారంలో మాజీ మంత్రి నారాయణను అరెస్టు చేసిన అంశంపై చంద్రబాబు స్పందించారు. ‘‘నారాయణ, చైతన్య విద్యా సంస్థల నుంచి మంచి చదువు అందుతోంది. అలాంటి విద్యాసంస్థలను ప్రోత్సహించాల్సిన అవసరం ఉంది. నారాయణ విద్యా సంస్థల బాధ్యతల నుంచి నారాయణ తప్పుకున్నారు. కేవలం రాజకీయ కక్షతోనే నారాయణను అరెస్టు చేశారు. 43 ఏళ్లు కష్టపడి విద్యాసంస్థలను నారాయణ నిర్మించారు’’ అని చంద్రబాబు పేర్కొన్నారు.