Aroori Ramesh: భాజపాలో చేరిన మాజీ ఎమ్మెల్యే అరూరి రమేశ్‌

హైదరాబాద్‌: వర్ధన్నపేట మాజీ ఎమ్మెల్యే అరూరి రమేశ్‌ భాజపాలో చేరారు. ఆ పార్టీ రాష్ట్ర అధ్యక్షుడు, కేంద్రమంత్రి కిషన్‌రెడ్డి ఆయనకు కాషాయ కండువా కప్పి ఆహ్వానించారు. భారాస వరంగల్‌ జిల్లా అధ్యక్షుడిగా ఉన్న రమేశ్‌.. శనివారం ఆ పార్టీకి రాజీనామా చేశారు. భారాసను వీడనున్నారనే ప్రచారం తర్వాత ఇటీవల మాజీ మంత్రి ఎర్రబెల్లి దయాకర్‌రావు, ముఖ్యనేతలు ఆయన్ను బుజ్జగించారు. అధినేత కేసీఆర్‌ దగ్గరకు తీసుకెళ్లి సముదాయించినా ఫలితం లేకపోయింది. అరూరి రమేశ్‌ భాజపా తరఫున వరంగల్‌ అభ్యర్థిగా బరిలో ఉండే అవకాశముంది. ఈ మేరకు ఆ పార్టీ నుంచి ఆయనకు హామీ లభించినట్లు సమాచారం.