లాక్‌డౌన్‌ పూర్తయ్యే వరకు మద్యం నిషేధించాలి

హైదరాబాద్‌: లాక్‌డౌన్‌ పూర్తిగా ఎత్తివేసేంత వరకు మద్యపాన నిషేధం కొనసాగాల్సిందేనని సీపీఐ జాతీయ కార్యదర్శి నారాయణ అన్నారు. ఒకవైపు వైద్యులు మద్యపానం వల్ల రోగ నిరోధకశక్తి తగ్గుతుందని చెబుతుంటే.. పాక్షిక సడలింపుల పేరుతో మద్యపానం విక్రయాలకు రాష్ట్రాలకు కేంద్రం అనుమతివ్వడం దివాళా కోరుతనమేనని నారాయణ మండిపడ్డారు. మద్యం ఆర్థిక వనరుగా పరిగణించడం అనైతికమన్నారు. బిహార్‌లో మద్యపాన నిషేధం ఎప్పటి నుంచో అమలు చేస్తోందని గుర్తుచేశారు. లాక్‌డౌన్‌ సమయంలో తాగుబోతుల కేసులు తగ్గాయని, వాహన ప్రమాదాలు తగ్గాయని పేర్కొన్నారు. తక్షణమే కేంద్ర ప్రభుత్వం స్పందించి దేశంలో పుర్తిగా లాక్‌డౌన్‌ ఎత్తివేసేంత వరకు మద్యపాన నిషేధం అమలు చేయాలని కోరారు.