నడ్డా..ప్రధానిని ఆ వివరాలు అడుగుతారా..?

భాజపా అధ్యక్షుడికి చిదంబరం సూటి ప్రశ్న

ఇంటర్నెట్‌డెస్క్‌: భారత్‌, చైనా సరిహద్దుల ఉద్రిక్తతలపై భాజపా, కాంగ్రెస్‌ పార్టీల మధ్య మాటల యుద్ధం కొనసాగుతోంది. గతవారం గల్వాన్‌ ఘటనలో 20 మంది భారత సైనికులు వీరమరణం పొందిన సంగతి తెలిసిందే. ఈ ఘటనపై మాజీ ప్రధాని డాక్టర్‌ మన్మోహన్‌ సింగ్‌ ఇటీవల తీవ్రంగా స్పందించగా సోమవారం ఆయనను విమర్శిస్తూ భాజపా జాతీయ అధ్యక్షుడు జేపీ నడ్డా ఎదురుదాడి చేశారు. మన్మోహన్‌ ప్రధానిగా ఉన్న కాలంలో 2010 నుంచి 2013 వరకు ఇరు దేశాల సరిహద్దుల్లో 600 సార్లు సైనికుల మధ్య దాడులు జరిగాయని.. వాటికి వివరణ ఇవ్వాలని కోరారు. 

ఈ ప్రకటనకు స్పందించిన కాంగ్రెస్‌ సీనియర్‌ నేత, మాజీ కేంద్ర మంత్రి పి.చిదంబరం మంగళవారం వరుస ట్వీట్లు చేశారు. ‘భారత్‌-చైనా సరిహద్దుల్లో 2010 నుంచి 2013 వరకు 600 దాడులు జరిగాయని, వాటికి వివరణ ఇవ్వాలని జేపీ నడ్డా అడిగారు. అవును.. నిజమే అవన్నీ జరిగాయి. కానీ, ఎక్కడా భారత భూభాగాన్ని చైనా ఆక్రమించలేదు. ఆ దాడుల్లో ఎప్పుడూ మన సైనికులు ప్రాణాలు కోల్పోలేదు. అలాగే 2015 నుంచి ఇప్పటి వరకు ఇరు దేశాల సరిహద్దుల్లో 2,264 దాడులు జరిగాయి, మరి వీటికి సంబంధించిన వివరాలను ప్రస్తుత ప్రధానిని నడ్డా అడుగుతారా..?’ అని పేర్కొన్నారు.