దేశంలో ఆంగ్లేయుల కాలం నాటి పరిస్థితులు

భాజపా.. కేసీఆర్‌ ఒక్కటే అని ఈటల మాటల్లో స్పష్టమైంది: రేవంత్‌

ఈనాడు, హైదరాబాద్‌: దళితులు, గిరిజనులు, బలహీనవర్గాల అభ్యున్నతికి కాంగ్రెస్‌ అద్భుతమైన రాజ్యాంగాన్ని తీసుకొస్తే కొందరు అబద్ధాలతో అధికారంలోకి వచ్చారని పీసీసీ అధ్యక్షుడు రేవంత్‌రెడ్డి అన్నారు. కాంగ్రెస్‌ తెచ్చిన అనేక హక్కులు, చట్టాలను కేంద్ర, రాష్ట్ర ప్రభుత్వాలు కాలరాస్తున్నాయన్నారు. దేశంలో ఆంగ్లేయుల కాలం నాటి పరిస్థితులు నెలకొన్నాయన్నారు. గణతంత్ర దినోత్సవం సందర్భంగా గురువారం గాంధీభవన్‌లో ఏఐసీసీ కార్యదర్శి నదీమ్‌ జావిద్‌, నాయకులు పొన్నాల లక్ష్మయ్య, చిన్నారెడ్డి, పవన్‌ ఖేరా, అంజన్‌కుమార్‌, మల్లు రవి తదితరులతో కలిసి జాతీయ పతాకాన్ని ఎగురవేశారు. ఈ సందర్భంగా రేవంత్‌ మాట్లాడారు. తర్వాత విలేకరులతోనూ ఇష్టాగోష్ఠిగా ముచ్చటించారు. ‘‘ప్రధాని మోదీ ప్రజారంగ సంస్థలను ప్రైవేటుకు విక్రయిస్తున్నారు. తొమ్మిది ప్రభుత్వాలను భాజపా కూలదోసి రాజ్యాంగాన్ని అపహాస్యం చేసింది. ఎమ్మెల్యేలు పార్టీఫిరాయిస్తే వారి సభ్యత్వం రద్దుచేయాలి. అవసరమైతే ఉరి తీసే విధానాన్ని, హత్యలు, అత్యాచారాలకు వేసే కఠిన శిక్షలను అమలు చేయాలి.  భాజపాలోనూ కేసీఆర్‌కు కోవర్టులున్నారని ఎమ్మెల్యే ఈటల రాజేందర్‌కు ఆ పార్టీలోకి వెళ్లాక అర్థమైంది. భాజపా.. కేసీఆర్‌ ఒక్కటే అన్న విషయం ఈటల మాటల్లో స్పష్టమైంది. కేసీఆర్‌ నియంతృత్వ ధోరణిని వ్యతిరేకించి భాజపాలో చేరినవారు సంతృప్తిగా లేరు.  పొంగులేటి శ్రీనివాస్‌రెడ్డితో భట్టి మాట్లాడుతున్నారు. కేంద్రంలో కాంగ్రెస్‌ అధికారంలోకి వచ్చాక ఫిరాయింపుల చట్టాన్ని కఠినతరం చేస్తాం. ఎమ్మెల్యేగా పోటీచేయడానికి వయసు 25 ఏళ్ల నుంచి 21కి తగ్గిస్తాం’’ అని రేవంత్‌ అన్నారు.