కేంద్ర బడ్జెట్‌లో బీసీలకు రూ.2 లక్షల కోట్లు కేటాయించాలి

ప్రధానికి ఆర్‌.కృష్ణయ్య లేఖ

ఈనాడు, హైదరాబాద్‌: కేంద్ర బడ్జెట్‌లో బీసీలకు రూ.2 లక్షల కోట్లు కేటాయించాలని జాతీయ బీసీ సంక్షేమ సంఘం అధ్యక్షుడు, ఎంపీ ఆర్‌.కృష్ణయ్య డిమాండ్‌ చేశారు. ఈ మేరకు ఆదివారం ఆయన ప్రధాని మోదీకి లేఖ రాశారు. దేశంలో 52 శాతానికి పైగా బీసీలున్నా.. ఈ దామాషాకు అనుగుణంగా నిధుల కేటాయింపు లేదని పేర్కొన్నారు. 2022-23 కేంద్ర బడ్జెట్‌లో కేవలం రూ.2 వేల కోట్లు మాత్రమే కేటాయించారని, అతి తక్కువ కేటాయింపుల వల్ల దేశవ్యాప్తంగా బీసీలకు తీవ్ర అన్యాయం జరుగుతోందని పేర్కొన్నారు. ఎస్సీ, ఎస్టీల మాదిరిగా దేశవ్యాప్తంగా బీసీ విద్యార్థులకూ ఉపకార వేతనాల పథకాన్ని అమలు చేయాలని కోరారు. రాష్ట్రాల్లో నిర్మించే వసతిగృహాలు, గురుకుల పాఠశాలలకు సొంత భవనాల కోసం కేంద్రం నిధులివ్వాలని, జాతీయ బీసీ కార్పొరేషన్‌ ద్వారా రుణ సదుపాయం కల్పించాలని పేర్కొన్నారు. ఎస్సీ, ఎస్టీలకు దేశవ్యాప్తంగా అమలు చేస్తున్న పథకాలను బీసీలకు సైతం అమలు చేసేందుకు ప్రధాని చొరవ తీసుకోవాలని కృష్ణయ్య అభ్యర్థించారు.