ఉత్తరాంధ్ర పట్టభద్రుల నియోజకవర్గ తెదేపా అభ్యర్థిగా చిరంజీవిరావు

విశాఖపట్నం (వన్‌టౌన్‌), న్యూస్‌టుడే: శాసనమండలి ఉత్తరాంధ్ర పట్టభద్రుల నియోజకవర్గ తెదేపా అభ్యర్థిగా విశ్రాంత అధ్యాపకుడు వేపాడ చిరంజీవిరావును ఎంపిక చేసినట్లు ఆ పార్టీ రాష్ట్ర అధ్యక్షుడు అచ్చెన్నాయుడు ప్రకటించారు. పార్టీ అధినేత చంద్రబాబు ఆదేశాల మేరకు అనకాపల్లి జిల్లా చోడవరం నియోజకవర్గం, రావికమతం మండలం, దొండపూడి గ్రామానికి చెందిన చిరంజీవిరావును ఎన్నికల బరిలో నిలుపుతున్నట్లు వెల్లడించారు. శనివారం విశాఖ తెదేపా కార్యాలయంలో జరిగిన కార్యక్రమంలో ఆయన పేరును అచ్చెన్నాయుడు ప్రకటించారు. జీవీఎంసీ కార్పొరేటరు గాడు చిన్నికుమారిలక్ష్మిని ఎన్నికల బరిలో దింపుతున్నట్లు గతంలో తెదేపా ప్రకటించింది. అయితే కొంత కాలం నుంచి అభ్యర్థి మార్పుపై తెదేపా వర్గాల్లో జోరుగా చర్చ సాగింది. ఈ క్రమంలో చిన్నికుమారిలక్ష్మి స్థానంలో చిరంజీవిరావును ఎంపిక చేసినట్లు పార్టీ అధిష్ఠానం ప్రకటించింది. స్థానిక తెదేపా నేతలకు చివరి నిమిషం వరకు ఈ సమాచారం లేకపోవడం పార్టీ వర్గాల్లో చర్చనీయాంశమైంది. చిరంజీవిరావు ఎంఏ, బీఈడీ, పీహెచ్‌డీ చేశారు. సబ్బవరం డిగ్రీ కళాశాలలో అర్థశాస్త్ర అధ్యాపకుడిగా పనిచేసి ఇటీవల స్వచ్ఛంద పదవీ విరమణ చేశారు.