ఉద్యోగ నియామకాల్లో అక్రమాలపై అధ్యయనం

భాజపా టాస్క్‌ఫోర్స్‌ కమిటీ నిర్ణయం

ఈనాడు, హైదరాబాద్‌: రాష్ట్రంలో 2014 నుంచి చేపట్టిన ఉద్యోగ నియామకాల్లో అక్రమాలు జరిగాయనే ఆరోపణలపై అధ్యయనం చేయాలని నిర్ణయించినట్లు ప్రశ్నపత్రాల లీకేజీపై ఏర్పాటైన భాజపా టాస్క్‌ఫోర్స్‌ కమిటీ ప్రకటించింది. టీఎస్‌పీఎస్సీ ప్రశ్నపత్రాల లీకేజీ సహా రాష్ట్రంలో ఇతర ఉద్యోగాల భర్తీలో జరిగిన అక్రమాలపై పూర్తిస్థాయిలో సమాచారం సేకరించి న్యాయపోరాటం చేయాలని సోమవారం జరిగిన కమిటీ సమావేశంలో నిర్ణయం తీసుకున్నట్లు ఓ ప్రకటనలో వెల్లడించింది. టీఎస్‌పీఎస్సీ మాజీ సభ్యుడు సీహెచ్‌.విఠల్‌ అధ్యక్షతన టాస్క్‌ఫోర్స్‌ కమిటీ సమావేశమైంది. సభ్యులు మాజీ ఎంపీ బూర నర్సయ్యగౌడ్‌, మాజీ ఎమ్మెల్యే మర్రి శశిధర్‌రెడ్డి, రిటైర్డ్‌ ఐపీఎస్‌ అధికారి కృష్ణప్రసాద్‌, మహిళా మోర్చా జాతీయ నాయకురాలు కరుణాగోపాల్‌ పాల్గొన్నారు. సింగరేణి కొలువుల్లో అక్రమాలు జరిగాయనే అంశంపై అక్కడ పర్యటించి సమాచారం సేకరించనున్నట్లు కమిటీ తెలిపింది. త్వరలో రాష్ట్రంలోని అన్ని వర్సిటీల్లో పర్యటించి ప్రశ్నపత్రాల లీకేజీపై విద్యార్థుల అభిప్రాయాలను తెలుసుకోనున్నట్లు పేర్కొంది.