తెదేపా నాయకులపై బలవంతంగా తప్పుడు కేసులు పెట్టించారు

సామాజిక మాధ్యమాల్లో వైరల్‌ అవుతున్న వైకాపా కార్యకర్త ఆడియో

ఏర్పేడు, న్యూస్‌టుడే: వైకాపా నాయకులు నన్ను బలవంతం చేసి తెదేపా నేతలపై తప్పుడు కేసులు పెట్టించారని తిరుపతి జిల్లా ఏర్పేడు మండలం పాతవీరాపురానికి చెందిన వైకాపా కార్యకర్త దామోదర్‌రెడ్డి మాట్లాడిన ఆడియో సామాజిక మాధ్యమాల్లో వైరల్‌గా మారింది. ఎమ్మెల్సీ ఎన్నికల్లో ఏర్పేడు జడ్పీ ఉన్నత పాఠశాల పోలింగ్‌ కేంద్రం వద్ద తెదేపా, వైకాపా నేతల మధ్య ఘర్షణ నెలకొన్న విషయం తెలిసిందే. ఈ నేపథ్యంలోనే దామోదర్‌రెడ్డి, మరో వ్యక్తి ఫిర్యాదుతో తెదేపా నేతలపై ఏర్పేడు పోలీసులు ఎస్సీ, ఎస్టీ, దాడి కేసులు నమోదు చేశారు. దీంతో తెదేపా నేతలు రహస్య ప్రాంతాల్లోకి వెళ్లారు. ఈ నేపథ్యంలో దామోదర్‌రెడ్డి ఓ తెదేపా నాయకుడితో సెల్‌ఫోన్‌లో మాట్లాడుతూ ‘నా చొక్కా చించుకుని రుయా ఆసుపత్రిలో చికిత్స పొందుతున్నట్లు వైకాపా నేతలు నటించమన్నారు. వారు చెప్పినట్లుగానే చేశా. చేసిన తప్పుకు బాధపడుతూ నిద్రలేని రాత్రులు గడుపుతున్నా. అనవసరంగా తప్పుడు కేసులు పెట్టించామని మా కుటుంబమంతా తీవ్ర ఆవేదన వ్యక్తం చేస్తోంది’ అంటూ సుమారు ఐదు నిమిషాలకు పైగా ఆయన మాట్లాడిన ఆడియో రాజకీయ వర్గాల్లో చర్చనీయాంశమైంది.