అభివృద్ధి లేక కునారిల్లుతున్న రాష్ట్రం

భారాస ఏపీ అధ్యక్షుడు తోట చంద్రశేఖర్‌
గుంటూరులో పార్టీ కార్యాలయం ప్రారంభం

ఈనాడు-అమరావతి: అభివృద్ధి లేక రాష్ట్రం కునారిల్లుతోందని.. నిరుద్యోగ సమస్య నానాటికీ పెరిగిపోతోందని భారాస ఏపీ అధ్యక్షుడు తోట చంద్రశేఖర్‌ ఆందోళన వ్యక్తం చేశారు. కక్షలు, కార్పణ్యాలతో రాష్ట్రంలో రాజకీయాలు ముడిపడి ఉన్నాయని, అధికారం కోసమే వైకాపా పని చేస్తోందని విమర్శించారు. భారాస ఏపీ కార్యాలయాన్ని ఆదివారం ఆయన గుంటూరులో ప్రారంభించారు. పార్టీ జెండా ఆవిష్కరించిన అనంతరం ఆయన మీడియా సమావేశంలో మాట్లాడారు. తెదేపా, వైకాపా పాలనలో ప్రజలు సంతృప్తిగా లేరని.. ఇక తామే ప్రత్యామ్నాయమన్నారు. రాష్ట్రానికి కొత్త పరిశ్రమలు, పెట్టుబడులు రావట్లేదు.. రాజధాని ఏదంటే సిగ్గుతో తలదించుకోవాల్సి వస్తోందని పేర్కొన్నారు. దేశంలో భారాస మూడో ప్రత్యామ్నాయంగా ఎదుగుతోందని వివరించారు.