నాడు గౌరవం.. నేడు అగౌరవం..: చర్చనీయాంశమైన బుద్ధా వెంకన్న ట్వీట్‌

ఈనాడు, అమరావతి: ‘కోవర్టు అని తెలియక చంద్రబాబు నీకు ఆ రోజు ఇచ్చిన గౌరవం.. నువ్వు కోవర్టు అని తెలుసు కాబట్టి జగన్‌రెడ్డి నీకు ఇచ్చిన అగౌరవం ఇది..!’ అంటూ తెదేపా రాష్ట్ర ప్రధాన కార్యదర్శి బుద్దా వెంకన్న.. విజయవాడ ఎంపీ కేశినేని నానిని ఉద్దేశించి చేసిన ట్వీట్‌ చర్చనీయాంశమైంది. ఇటీవల చంద్రబాబు దంపతులు దుర్గగుడి దర్శనానికి వచ్చిన సందర్భంగా ఎంపీ కేశినేని నానికి ఆయన నమస్కరించి, వెంటబెట్టుకుని నడిచారు. పార్టీ మారి వైకాపాలో చేరిన తర్వాత శుక్రవారం విజయవాడలో అంబేడ్కర్‌ విగ్రహావిష్కరణకు వచ్చిన సీఎం జగన్‌కు ఎంపీ కేశినేని రెండు చేతులతో నమస్కరిస్తున్నా.. కనీసం పట్టించుకోకుండా ముందుకు వెళ్లారు. ఈ రెండు వీడియోలను బుద్దా వెంకన్న ట్వీట్‌కు జతచేశారు.