Vizianagaram: ‘కోలగట్ల ఓ వడ్డీకాసులవాడు’

ఆయన అవినీతిని నిరూపిస్తా
వైకాపా నేత గౌరీశంకర్‌

విజయనగరం పట్టణం, న్యూస్‌టుడే: డిప్యూటీ స్పీకర్‌ కోలగట్ల వీరభద్రస్వామి గురించి ‘స్వామివారి సూపర్‌హిట్‌ రాజకీయ లీలలు’ కథలు కథలుగా చెప్పుకోవచ్చని, ఆయన అవినీతి, అరాచకాలను ఆధారాలతో నిరూపిస్తామని వైకాపా నేత, కో-ఆపరేటివ్‌ అర్బన్‌బ్యాంకు మాజీ అధ్యక్షుడు కాళ్ల గౌరీశంకర్‌ ఆరోపించారు. మంగళవారం విజయనగరంలో ఆయన విలేకర్లతో మాట్లాడారు. కోలగట్ల అవినీతిని నిరూపిస్తే.. ఆయన పదవికి రాజీనామా చేస్తారా అని సవాల్‌ విసిరారు. నగరంలో వడ్డీకాసుల వాడంటే ఎమ్మెల్యే అని అందరికీ తెలిసిపోతుందని ఎద్దేవా చేశారు. లేఅవుట్లకు ల్యాండ్‌ కన్వర్షన్‌ అనుమతులు కావాలంటే స్వామివారి దర్శనం చేసుకుని, అక్కడ ఉండే కౌంటర్‌ 1, 2లను కలిస్తే వారు చెప్పినట్లు ఆ స్వామివారి చిట్స్‌ కంపెనీలో రూ.50 లక్షల నుంచి రూ.కోటి వరకు చిట్స్‌ కట్టాల్సిందేనన్నారు. అతని అల్లుడికీ వాటా ఇవ్వాలని, లేకపోతే అనుమతులు రావన్నారు. సబ్‌రిజిస్ట్రార్‌ కార్యాలయంలో ప్రభుత్వ ఫీజులు కాకుండా అదనంగా ఇచ్చే ముడుపులు నేరుగా ఆయనకు చేరుతున్నాయని ఆరోపించారు. ఎమ్మెల్యే నిధులతో ఏ అభివృద్ధి పనులు చేశారో చెప్పాలన్నారు. నగరపాలక సంస్థ నిధులతో చేస్తే ఎమ్మెల్యే అభివృద్ధి చేశారని చెప్పుకొంటున్నారన్నారు. తెదేపా హయాంలోనే నగరంలో రోడ్లవిస్తరణ జరిగిందని, కొంతమేరకు మిగిలిన పనులకు రంగులు, దీపాలు ఏర్పాటుచేసి తాను చేసినట్లు చెప్పుకొంటున్నారన్నారు. ఎమ్మెల్యే అరాచకాలను ఒక్కొక్కొటిగా బహిర్గతం చేస్తామని పేర్కొన్నారు.