రాష్ట్రంలో ప్రభుత్వ ప్రేరేపిత ఉగ్రవాదం

తెదేపా అధినేత చంద్రబాబు ట్వీట్‌

ఈనాడు డిజిటల్‌, అమరావతి: రాష్ట్రంలో ప్రభుత్వ ప్రేరేపిత ఉగ్రవాదం నడుస్తోందని తెదేపా అధినేత చంద్రబాబు మండిపడ్డారు. సీనియర్‌ పాత్రికేయుడు అంకబాబు అరెస్టు అక్రమమంటూ న్యాయస్థానం ఆయన రిమాండును తిరస్కరించడంపై సీఎం జగన్‌, రాష్ట్ర డీజీపీ సమాధానం చెప్పాలని శుక్రవారం ట్విటర్‌ వేదికగా డిమాండు చేశారు. ‘అక్రమ అరెస్టులకు సమాధానం చెప్పాల్సిన స్థితిని ఏపీ పోలీసు శాఖకు తీసుకొచ్చిందెవరు? తమ తప్పుడు వైఖరికి సీఐడీ సిగ్గుపడాలి’ అని చంద్రబాబు ట్వీట్‌లో ప్రశ్నించారు. సీఐడీ అధికారులకు న్యాయస్థానం ఇచ్చిన నోటీసులను ట్వీట్‌కు జతచేశారు.

అరెస్టు దారుణం: వి.శ్రీనివాసరావు
ముందస్తు నోటీసులు లేకుండా అంకబాబును అరెస్టు చేయడం దారుణమని సీపీఎం రాష్ట్ర కార్యదర్శి వి.శ్రీనివాసరావు మండిపడ్డారు. చట్టవ్యతిరేక చర్యపై ప్రభుత్వం స్పందించాలని డిమాండు చేశారు.

* రాష్ట్రంలో పత్రికాస్వేచ్ఛ లేకుండా చేయాలని ప్రభుత్వం చూస్తోందని జర్నలిస్ట్‌ అసోసియేషన్‌ ఆఫ్‌ ఆంధ్రప్రదేశ్‌ సలహా కమిటీ ఛైర్మన్‌ ఉప్పల లక్ష్మణ్‌ ఆరోపించారు.