సీఎంను విమర్శిస్తే పథకాలు రద్దు చేస్తాం

ఉపమఖ్యమంత్రి రాజన్నదొర

మెంటాడ, న్యూస్‌టుడే: ప్రభుత్వం అందజేస్తున్న సంక్షేమ పథకాలు పొందుతూ ప్రభుత్వాన్ని, ముఖ్యమంత్రిని ఎవరైనా విమర్శిస్తే వారి సంక్షేమ పథకాలను రద్దు చేస్తామని ఉప ముఖ్యమంత్రి పి.రాజన్నదొర హెచ్చరించారు. విజయనగరం జిల్లా మెంటాడ మండలంలో సోమవారం జరిగిన చేయూత పథకం చెక్కు పంపిణీ సభలో రాజన్నదొర మాట్లాడుతూ.. కొందరు గిట్టనివారు పథకాలు పొందుతూ సీఎం జగన్‌, ప్రభుత్వంపై విమర్శలు చేస్తున్నారని, ఈ పద్ధతి సరికాదని చెప్పారు. అమరావతి రైతులు చేస్తున్న పాదయాత్రలో ఉన్నది రైతులు కాదని, తెలుగుదేశం పార్టీకి చెందిన కార్యకర్తలని విమర్శించారు. ఉత్తరాంధ్ర వెనుకబాటు నుంచి బయటపడాలంటే విశాఖలో రాజధాని నిర్మించాల్సిన అవసరం ఉందని చెప్పారు.