Telangana News: నా వెనక భాజపా ఉందనే విమర్శలు అర్థరహితం: కేఏ పాల్‌

హైదరాబాద్: కులాలు, మతాల పేరుతో చిచ్చు పెట్టే వారు ఎవరైనా సరే ఉపేక్షించేది లేదని ప్రజాశాంతి పార్టీ అధ్యక్షుడు కేఏ పాల్‌ హెచ్చరించారు. తెలంగాణలో లా అండ్‌ ఆర్డర్‌ పూర్తిగా దారి తప్పిందన్నారు. దేశంలో ఉన్న పార్టీలన్నీ అవినీతి, కుటుంబ పార్టీలేనని విమర్శించారు. కాంగ్రెస్‌ పార్టీకి భాజపా అంటే భయమని.. దేశంలోని మిగిలిన అన్నీ పార్టీలు భాజపా అనుబంధ పార్టీలేనని వ్యాఖ్యానించారు. హైదరాబాద్‌లో కేఏ పాల్‌ మీడియాతో మాట్లాడారు. రాష్ట్ర ప్రజలు ఇప్పటివరకు ఎవరెవరో దోచుకునే వాళ్లకు అధికారం ఇచ్చారని.. ప్రజలకు సేవ చేసేందుకు ఒకసారి తనకు అవకాశం ఇవ్వాలని కోరారు. తన వెనుక భాజపా ఉందనే విమర్శలు అర్థరహితమైనవని.. అవి కొంతమంది పనిలేని వాళ్లు చేసే విమర్శలు అని ఆయన కొట్టిపారేశారు. చేసిన తప్పులు కప్పిపుచ్చుకోడానికి తెరాస ఇలాంటి అవాస్తవాలు ప్రచారం చేస్తోందని విమర్శించారు.