రాజు మారితే రాజధాని మార్చాలా?:కనకమేడల

విజయవాడ: విభజన చట్టం ప్రకారమే అమరావతిని రాజధానిగా ఏర్పాటు చేయడం జరిగిందని తెదేపా రాజ్యసభ సభ్యుడు కనకమేడల రవీంద్రకుమార్‌ స్పష్టం చేశారు. విజయవాడలో ఆయన మీడియాతో మాట్లాడుతూ... కేంద్రం నియమించిన కమిటీతోపాటు, వివిధ కమిటీల సిఫారసుల మేరకు రాజధానిపై నిర్ణయం జరిగిందన్నారు. శివరామకృష్ణన్‌ కమిటీ సిఫారసుకు వ్యతిరేకంగా రాజధానిని నిర్ణయించారనేది అవాస్తవమన్నారు. రాజధానిపై సామాజిక ముద్రవేసి దానిని తగలబెట్టాలనే ప్రయత్నం వైకాపా ప్రభుత్వం చేస్తోందని మండిపడ్డారు.

 రైతులు తమ జీవనాధారాన్ని త్యాగం చేస్తే, ప్రభుత్వం మూడు రాజధానుల పేరుతో వారిని అభద్రతా భావంలోకి నెట్టేసిందన్నారు. చంద్రబాబు ఏర్పాటు చేసిన రాజధానిని నాశనం చేయాలనే లక్ష్యంతో వైకాపా ప్రభుత్వం అడుగులు వేస్తోందని ఆరోపించారు. రాజులు మారినప్పుడల్లా రాజధాని మార్చుకోవచ్చనేది  చట్టంలో ఉందా అని ప్రశ్నించారు. రాజధాని మార్పునకు సహేతకమైన ఒక్క కారణమైనా చూపించగలరా అని నిలదీశారు. రాష్ట్రపతి నోటిఫికేషన్‌తో హైకోర్టు ఏర్పడిందని, రాష్ట్రపతి నోటిఫికేషన్‌కు వ్యతిరేకంగా చట్టాలు చేసే అధికారం రాష్ట్ర ప్రభుత్వానికి లేదన్నారు. రాజ్యాంగ పదవుల్లో ఉన్న వారు సైతం న్యాయవ్యవస్థ తీరుపై విమర్శలు చేయడం సరికాదని కనకమేడల రవీంద్రకుమార్‌ అన్నారు.