Pawan Kalyan: జ్వరం నుంచి కోలుకున్న పవన్‌.. 7 నుంచి మళ్లీ జనంలోకి..

అమరావతి: తీవ్రమైన జ్వరం కారణంగా వారాహి విజయభేరి సభలకు తాత్కాలిక విరామం ప్రకటించిన జనసేన అధినేత పవన్‌ కల్యాణ్‌ తదుపరి పర్యటనకు సిద్ధమవుతున్నారు. జ్వరం నుంచి కోలుకున్న ఆయన.. ఈ నెల 7 నుంచి యథాతథంగా తన ఎన్నికల ప్రచార యాత్రను కొనసాగించనున్నారు. ఈ విషయాన్ని పవన్‌ రాజకీయ కార్యదర్శి పి.హరిప్రసాద్‌ ఓ ప్రకటనలో వెల్లడించారు. వారాహి విజయ భేరి యాత్రలో భాగంగా ఈ నెల 7న అనకాపల్లిలో సభ నిర్వహిస్తారని తెలిపారు. 8వ తేదీన ఎలమంచిలి నియోజకవర్గంలో నిర్వహించే సభలో పాల్గొంటారని పేర్కొన్నారు. 9న పవన్‌ తాను పోటీ చేస్తున్న పిఠాపురం నియోజకవర్గంలో ఉగాది వేడుకల్లో పాల్గొంటారని తెలిపారు. నెల్లిమర్ల, విశాఖ దక్షిణ, పెందుర్తి నియోజకవర్గాల్లో పర్యటనకు సంబంధించిన షెడ్యూల్‌ను త్వరలో ఖరారు చేస్తామన్నారు.