ఆర్థిక రంగాన్ని బలోపేతం చేసే ప్రయత్నం: పవన్‌ కల్యాణ్‌

అమరావతి: పార్లమెంటులో ఆర్థిక మంత్రి నిర్మలా సీతారామన్‌ ప్రవేశపెట్టిన వార్షిక బడ్జెట్‌పై జనసేన అధినేత పవన్‌ కల్యాణ్‌ స్పందించారు. ఉత్పాదక, వ్యవసాయ రంగాలను బలోపేతం చేయడం ద్వారా దేశ ప్రగతిని ముందుకు తీసుకువెళ్లే విధంగా బడ్జెట్‌ను ప్రభుత్వం రూపకల్పన చేయడం ఆశావహ పరిణామమన్నారు. తెలుగు రాష్ట్రాలకు సంబంధించిన విభజన హామీలు, పోలవరం ప్రాజెక్ట్ గురించి బడ్జెట్‌లో లేకపోవడం నిరాశ కలిగించిందన్నారు. అభివృద్ధి చెందిన దేశాలతో మన దేశం పోటీ పడే విధంగా ఒక గొప్ప దార్శనికతను ఈ బడ్జెట్ ప్రతిబింబిస్తోందని పేర్కొన్నారు. కాలానుగుణంగా మారుతున్న సాంకేతికతను దేశంలో ప్రవేశపెట్టడానికి చేస్తున్న ప్రయత్నాలు మంచి ఫలితాన్ని అందిస్తాయని జనసేన భావిస్తోందన్నారు. ప్రధానమంత్రి గతిశక్తి బహుళార్ధక పథకం దేశ ఆర్థిక వ్యవస్థకు జవసత్వాలు ఇచ్చే విధంగా ఉందన్నారు. ముఖ్యంగా డిజిటల్ కరెన్సీ, డిజిటల్ బ్యాంకింగ్ కారణంగా వ్యాపార వ్యవహారాలు, నగదు లావాదేవీల్లో పారదర్శకత పెరిగి అవకతవకలు తగ్గే అవకాశం ఉన్నట్లు పవన్‌ కల్యాణ్‌ తెలిపారు. డిజిటల్ విశ్వవిద్యాలయం ఏర్పాటుతో దేశం సాంకేతిక అవసరాలు తీర్చగల ఉత్తమ ప్రమాణాలు కలిగిన ఉద్యోగులు రూపొందుతారని, ప్రాంతీయ భాషలలో విద్య బోధన కోసం 200 టెలివిజన్‌ చానళ్లు ప్రారంభించడానికి సంకల్పించడం, ప్రాంతీయ భాషల్లో చదువుకునే వారికి మేలు చేస్తుందన్నారు. రక్షణ రంగం బడ్జెట్ 12 శాతం పెంచడం దేశ భద్రతరీత్యా అవసరమని తెలిపారు. రక్షణ ఉత్పత్తుల్లో మనం స్వావలంబన సాధించే విధంగా ప్రణాళికలు సిద్ధపరచడం మంచి పరిణామమన్నారు. గత రెండేళ్లుగా కరోనా కారణంగా ఎన్నో కష్టనష్టాలు చవిచూస్తున్నాం. ఈ పరిస్థితుల్లో ఆర్థిక వ్యవస్థ పతనం కాకుండా కాపాడిన వ్యవసాయ రంగానికి బడ్జెట్లో ప్రాధాన్యత ఇవ్వడం రైతన్నలకు భరోసా కల్పించడంగా జనసేన భావిస్తోందన్నారు. ఆధునిక వ్యవసాయం దిశగా వేసే అడుగుల వేగం పెరిగినట్లు అర్థమవుతోందని, వ్యవసాయ రంగంలో మౌలిక వసతుల కల్పన, ఆహార శుద్ధి యూనిట్ల ఏర్పాటు, అద్దె ప్రాతిపదికన రైతులకు వ్యవసాయ పనిముట్లు, యంత్రాలను అందించడం, వ్యవసాయ అంకురాలకు ప్రోత్సాహకాలు రైతులకు ప్రయోజనకరంగా ఉంటాయని జనసేనాని తెలిపారు.  

ప్రజలకు వ్యక్తిగత ప్రయోజనాలు ఈ బడ్జెట్లో లేనప్పటికీ ఆర్ధిక వ్యవస్థను బలోపేతం చేయడం ద్వారా ప్రజల ఆర్థిక పరిస్థితిని మెరుగుపరచడానికి ఆర్థిక మంత్రి నిర్మలా సీతారామన్ చేసిన ప్రయత్నాలు సఫలీకృతం కావాలని జనసేన కోరుకుంటుందన్నారు. ఐదేళ్లలో 60 లక్షల కొత్త ఉద్యోగాలు కల్పించాలని బడ్జెట్‌లో పేర్కొనడాన్ని జనసేన స్వాగతిస్తోందన్నారు. అదేవిధంగా రాష్ట్రాలకు రూ.లక్ష కోట్లతో నిధి, 50 ఏళ్ల వరకు వడ్డీ లేకుండా లక్ష కోట్ల రూపాయల రుణాన్ని రాష్ట్రాలు తీసుకునే అవకాశం రాష్ట్రాలకు మేలు చేస్తుందని పవన్‌ కల్యాణ్‌ అన్నారు. ముఖ్యంగా ఆర్థిక పరిస్థితి దయనీయంగా ఉన్న ఆంధ్రప్రదేశ్ వంటి రాష్ట్రాలకు ఉపయుక్తంగా ఉంటుందన్నారు. ప్రజలపై కొత్తగా పన్నుల భారం వేయకుండా బడ్జెట్‌ను రూపొందించిన ప్రధాని నరేంద్ర మోదీ నాయకత్వంలోని భాజపా ప్రభుత్వాన్ని, ఆర్థిక మంత్రి నిర్మలా సీతారామన్‌ను జనసేన పార్టీ అభినందిస్తుందని పవన్‌ కల్యాణ్‌ పేర్కొన్నారు.