జగన్‌ ముందుంటే.. మేమంతా ఆయన వెంటే: అయ్యన్న

విశాఖ: విశాఖ ఉక్కు కర్మాగారం ప్రైవేటీకరణ వ్యతిరేక పోరాటానికి సీఎం జగన్‌ నాయకత్వం వహించాలని తెదేపా సీనియర్‌ నేత, మాజీ మంత్రి అయ్యన్నపాత్రుడు కోరారు. సీఎం ముందుంటే తామంతా ఆయన నాయకత్వంలో పోరాడేందుకు తామంతా సిద్ధమని సవాల్‌ విసిరారు. దిల్లీ వెళ్లి ప్రధాని వద్ద పోరాడదామని అయ్యన్న పిలుపునిచ్చారు. విశాఖలోని తెదేపా కార్యాలయంలో నిర్వహించిన మీడియా సమావేశంలో ఆయన మాట్లాడారు. 

వైకాపా ఎంపీలతో వెళ్లి కేంద్రం మెడలు ఎందుకు వంచడం లేదని సీఎం జగన్‌ను అయ్యన్నపాత్రుడు నిలదీశారు. వైకాపా వాటాలు కొనాలని చూస్తోందనే అనుమానాలు ఉన్నాయన్నారు. ఉక్కు కర్మాగారం లాంటి పెద్ద సమస్య వచ్చినపుడు ఎందుకు మౌనంగా ఉంటున్నారని సీఎంను ప్రశ్నించారు. ప్రణాళిక ప్రకారమే ఇదంతా జరుగుతున్నట్లు ఉందని ఆక్షేపించారు. పార్టీలకు అతీతంగా విశాఖ ఉక్కు ప్రైవేటీకరణ వ్యతిరేక పోరాటం చేద్దామన్నారు. 
ఉక్కు కర్మాగారంపై ప్రత్యక్షంగా 40వేల మంది, పరోక్షంగా లక్ష మంది ఆధారపడి ఉన్నారని చెప్పారు. ప్రైవేటీకరణను అడ్డుకునేందుకు ప్రజలంతా ఒకేమాటపై ఉండాలని అయ్యన్నపాత్రుడు పిలుపునిచ్చారు.

ఇవీ చదవండి..