Amaravati: ఇప్పటికైనా పట్టుదలకు పోకుండా అభివృద్ధి చేయాలి: ధూళిపాళ్ల

అమరావతి: మూడు రాజధానులు, సీఆర్డీఏ రద్దు పిటిషన్లపై ఏపీ హైకోర్టు ఇచ్చిన తీర్పును స్వాగతిస్తున్నామని తెదేపా సీనియర్‌ నేత, మాజీ ఎమ్మెల్యే ధూళిపాళ్ల నరేంద్ర అన్నారు. సీఆర్డీఏ చట్టం ప్రకారం రాష్ట్ర ప్రభుత్వం వ్యవహరించాలని.. ఒప్పందం ప్రకారం 6 నెలల్లో అభివృద్ధి పనులన్నీ పూర్తిచేయాలని ఉన్నత న్యాయస్థానం ఆదేశించిందని చెప్పారు. ఇప్పటికైనా ప్రభుత్వం పట్టుదలకు పోకుండా అమరావతిని రాజధానిగా కొనసాగిస్తూ అభివృద్ధి చేయాలని ఆయన డిమాండ్‌ చేశారు. రాజధాని వివాదాలకు సీఎం జగన్‌ స్వస్తి పలకాలని.. స్థానిక రైతులుపై కక్షపూరిత చర్యలు ఆపాలన్నారు. రాష్ట్ర ప్రభుత్వం తమ తప్పును తెలుసుకుని రాజధాని ప్రాంతంలో భవన నిర్మాణాలను పూర్తిచేయాలని కోరారు.