Mayawati: బీఎస్పీ ఎంపీపై భాజపా ఎంపీ అభ్యంతరకర వ్యాఖ్యలు... మాయావతి రియాక్షన్‌ ఇదే!

లఖ్‌నవూ: తమ పార్టీ ఎంపీ డానిష్‌ అలీ(Danish Ali)పై భాజపా ఎంపీ రమేశ్‌ బిధూరీ(Ramesh Bidhuri) చేసిన అభ్యంతరకర వ్యాఖ్యల ఘటనపై బీఎస్పీ అధినేత్రి మాయావతి(Mayawati) స్పందించారు. ఈ వ్యవహారంలో భాజపా ఇంతవరకు తగిన చర్యలు తీసుకోకపోవడం దురదృష్టకరమన్నారు. ఈ మేరకు ఆమె ఎక్స్‌ (ట్విటర్‌)లో స్పందించారు. ‘బీఎస్పీ ఎంపీ డానిష్ అలీపై భాజపా ఎంపీ చేసిన అభ్యంతరకర వ్యాఖ్యలను రికార్డుల నుంచి స్పీకర్ తొలగించడం, ఆ ఎంపీకి హెచ్చరికలు జారీచేయడంతో పాటు ఇదే అంశంపై ఓ సీనియర్‌ మంత్రి సభలో క్షమాపణలు చెప్పినప్పటికీ ఇంతవరకు భాజపా మాత్రం ఆయనపై తగిన చర్యలు తీసుకోకపోవడం విచారకరం’ అని పేర్కొన్నారు. 

బీఎస్పీ ఎంపీపై కామెంట్స్‌.. పార్టీ ఎంపీకి భాజపా షోకాజ్‌ నోటీస్‌

పార్లమెంట్‌ ప్రత్యేక సమావేశాల వేళ గురువారం చంద్రయాన్‌-3 విజయంపై చర్చ సందర్భంగా దిల్లీకి చెందిన భాజపా ఎంపీ రమేశ్‌ బిధూరీ (Ramesh Bidhuri) లోక్‌సభలో బహుజన్‌ సమాజ్‌ పార్టీ(BSP)కి చెందిన ఎంపీ డానిష్‌ అలీపై చేసిన ఆ వ్యాఖ్యలను విపక్షాలు సైతం ఖండించాయి. ఆయన్ను సస్పెండ్‌ చేయాలని డిమాండ్‌ చేస్తున్నాయి. ఇదిలా ఉండగా.. భాజపా సదరు ఎంపీకి షోకాజ్‌ నోటీసులు జారీ చేసిన విషయం తెలిసిందే.