లంకపై కివీస్‌ క్లీన్‌స్వీప్‌

రెండో టెస్టులో ఇన్నింగ్స్‌ విజయం

వెల్లింగ్టన్‌: శ్రీలంకతో రెండు టెస్టుల సిరీస్‌ను ఆతిథ్య న్యూజిలాండ్‌ 2-0తో క్లీన్‌స్వీప్‌ చేసింది. రెండో టెస్టులో ఆ జట్టు ఇన్నింగ్స్‌ 58 పరుగుల తేడాతో లంకను చిత్తు చేసింది. ఫాలోఆన్‌ ఆడుతూ నాలుగో రోజు 113/2తో రెండో ఇన్నింగ్స్‌ కొనసాగించిన లంక.. ప్రతిఘటించినా ఫలితం లేకపోయింది. కీలక సమయంలో వికెట్లు చేజార్చుకున్న ఆ జట్టు 358 పరుగులకే ఆలౌటైంది. ధనంజయ డిసిల్వా  (98; 185 బంతుల్లో 12×4, 1×6) పోరాటం వృథా అయింది. ఓవర్‌నైట్‌ బ్యాటర్లు కుశాల్‌ మెండిస్‌ (50), మాథ్యూస్‌ (2) ఎక్కువసేపు నిలవకపోగా.. దినేశ్‌ చండిమాల్‌ (62)తో కలిసి ధనంజయ కివీస్‌ బౌలర్లను సమర్థంగా ఎదుర్కొన్నాడు. ఒక దశలో 242/4తో లంక మెరుగైన స్థితిలో నిలిచింది. చండిమాల్‌ ఔటైనా.. మధుశంక (39) తోడుగా ధనంజయ ఇన్నింగ్స్‌ను ముందుకు తీసుకెళ్లాడు. కానీ ఓవర్‌ తేడాతో మధుశంక, ధనంజయ వెనుదిరగడంతో లంక పని అయిపోయింది. చివరి 4 వికెట్లను లంక 40 పరుగులకే కోల్పోయింది. సౌథీ (3/51), టిక్నర్‌ (3/84), మైకేల్‌ బ్రాస్‌వెల్‌ (2/100) కివీస్‌ విజయంలో కీలకపాత్ర పోషించారు. న్యూజిలాండ్‌ తొలి ఇన్నింగ్స్‌లో 580/4 వద్ద డిక్లేర్‌ చేయగా..లంక 164 పరుగులకే కుప్పకూలింది.