Sanju Samson: రాజస్థాన్‌ కెప్టెన్‌ సంజూ శాంసన్‌కు కోపమొచ్చింది

జైపుర్‌: మెగా టీ20 లీగ్‌ ముంగిట రాజస్థాన్‌ కెప్టెన్‌ సంజు శాంసన్‌కు కోపమొచ్చింది. అతడికి కోపం తెప్పించింది ఆ ఫ్రాంఛైజీ సామాజిక మాధ్యమ బృందమే కావడం గమనార్హం. కొత్త సీజన్‌ ఆరంభం కాబోతున్న నేపథ్యంలో అభిమానుల్లో ఉత్సాహం నింపేలా కొన్ని రోజులుగా రాజస్థాన్‌ ట్విటర్‌ ఖాతాలో సరదా పోస్టులు చాలానే పడ్డాయి.  ఈ క్రమంలోనే శాంసన్‌ ఫొటోను మార్ఫ్‌ చేసి తాజాగా ఒక పోస్టు పెట్టారు. అది చూసి ఆగ్రహించిన శాంసన్‌.. స్నేహితులు ఇలాంటివి చేస్తే బాగుంటుంది కానీ, జట్లు ప్రొఫెషనల్‌గా ఉండాలని అన్నాడు. అంతే కాక జట్టు ట్విట్టర్‌ ఖాతాను అన్‌ ఫాలో చేశాడు. కాసేపటికే రాజస్థాన్‌ ఆ ట్వీట్‌ను తొలగించి, ఒక ప్రకటన చేసింది. అభిమానుల్లో ఉత్సాహం నింపే ప్రయత్నంలో ఇది చోటు చేసుకుందని, తమ సామాజిక మాధ్యమ బృందాన్ని తప్పించి కొత్త టీమ్‌ను తీసుకొస్తున్నామని పేర్కొంది.