Russia: రష్యా క్రీడాకారిణి దేశం మారి.. నిషేధం తప్పించుకుని..

లండన్‌: ఉక్రెయిన్‌పై యుద్ధం నేపథ్యంలో వింబుల్డన్‌లో పాల్గొనకుండా రష్యా క్రీడాకారులపై నిర్వాహకులు నిషేధం విధించగా.. ప్రతిష్టాత్మక గ్రాండ్‌స్లామ్‌లో ఎలాగైనా పాల్గొనాలన్న సంకల్పం ఒక క్రీడాకారిణిని తన జాతీయతను మార్చుకునేలా చేసింది. రష్యా డబుల్స్‌ క్రీడాకారిణి నటెలా జలామిద్జె తన దేశాన్ని వదులుకుని జార్జియా జాతీయురాలిగా మారింది. దీంతో ఈనెల 27న ప్రారంభమయ్యే వింబుల్డన్‌లో అలెగ్జాండ్రా క్రునిచ్‌ (సెర్బియా)తో కలిసి మహిళల డబుల్స్‌లో పాల్గొనేందుకు జలామిద్జెకు మార్గం సుగమం అయింది. 29 ఏళ్ల జలామిద్జె ప్రస్తుతం ప్రపంచ ర్యాంకింగ్స్‌లో 44వ స్థానంలో ఉంది. ఉక్రెయిన్‌పై యుద్ధం కారణంగా రష్యా, బెలారస్‌ క్రీడాకారులు వింబుల్డన్‌లో పాల్గొనకుండా నిషేధం విధిస్తున్నట్లు ఏప్రిల్‌లో ప్రకటించారు. అయితే జలామిద్జె జార్జియా జాతీయురాలిగా మారి నిషేధాన్ని తప్పించుకుంది. ఈ విషయంలో తాము జోక్యం చేసుకోలేమంటూ ఆల్‌ ఇంగ్లాండ్‌ క్లబ్‌ ప్రతినిధి ప్రకటించాడు.