శ్రీలంక 212; ఆసీస్‌ 98/3

గాలె: స్పిన్నర్లు నాథన్‌ లైయన్‌ (5/90), మిషెల్‌ స్వెప్సన్‌ (3/55) విజృంభించడంతో ఆస్ట్రేలియాతో తొలి టెస్టులో ఆతిథ్య శ్రీలంక తడబడింది. బుధవారం ప్రారంభమైన ఈ మ్యాచ్‌లో శ్రీలంక తొలి ఇన్నింగ్స్‌లో 59 ఓవర్లలో 212 పరుగులకు ఆలౌటైంది. టాస్‌ గెలిచి తొలుత బ్యాటింగ్‌ చేసిన శ్రీలంకను మొదట కమిన్స్‌ (1/25), స్టార్క్‌ (1/31) దెబ్బతీశారు. నిసాంక (23)ను కమిన్స్‌, కుశాల్‌ మెండిస్‌ (3)ను స్టార్క్‌ వెనక్కి పంపారు. ఆ తర్వాత లైయన్‌, స్వెప్సన్‌ క్రమం తప్పకుండా వికెట్లు పడగొడుతూ శ్రీలంకపై ఒత్తిడి పెంచారు. కెప్టెన్‌ దిముత్‌ కరుణరత్నె (28), ఏంజెలో మాథ్యూస్‌ (39), నిరోషన్‌ డిక్‌వెలా (58), రమేశ్‌ మెండిస్‌ (22; 36 బంతుల్లో 3×4) ఫర్వాలేదనిపించారు. డిక్‌వెలా, మెండిస్‌ ఏడో వికెట్‌కు 54 పరుగులు జోడించారు. అనంతరం మొదటి రోజు ఆట ముగిసే సమయానికి ఆసీస్‌ తొలి ఇన్నింగ్స్‌లో 25 ఓవర్లలో 3 వికెట్లకు 98 పరుగులు సాధించింది. డేవిడ్‌ వార్నర్‌ (25; 24 బంతుల్లో 5×4), లబుషేన్‌ (13; 2×4)లను ఆఫ్‌ స్పిన్నర్‌ రమేశ్‌ మెండిస్‌ (2/35) పెవిలియన్‌కు పంపగా.. స్టీవ్‌ స్మిత్‌ (6) రనౌటయ్యాడు. ఓపెనర్‌ ఉస్మాన్‌ ఖవాజా (47 బ్యాటింగ్‌; 86 బంతుల్లో 5×4), ట్రావిస్‌ హెడ్‌ (6 బ్యాటింగ్‌) క్రీజులో ఉన్నారు.