ధోనీకి రూ.40 చికిత్స

రాంచి: టీమ్‌ఇండియా మాజీ కెప్టెన్‌ మహేంద్ర సింగ్‌ ధోని తన సాధారణ వ్యక్తిత్వంతో మరోసారి వార్తల్లోకెక్కాడు. తన మోకాలి నొప్పికి పరిష్కారం కోసం మహి.. రాంచీకి సమీపంలోని అడవిలో ఉండే ఓ ఆశ్రమంలోని ఆయుర్వేద వైద్యుడిని సంప్రదించినట్లు సమాచారం. ధోనీకి చికిత్స కోసం ఆ వైద్యుడు కేవలం రూ.40 తీసుకున్నట్లు తెలిసింది. గత కొన్ని నెలలుగా మోకాలి నొప్పితో ధోని బాధపడుతున్నాడు. ఈ నేపథ్యంలో తన తల్లిదండ్రులకు చికిత్స అందిస్తున్న వందన్‌ సింగ్‌ అనే ఆయుర్వేద వైద్యుణ్ని కలవాలని నిర్ణయించుకున్నాడు. కాల్షియం లోపం కారణంగా మోకాలి నొప్పితో బాధపడుతున్నట్లు ధోని చెప్పాడని ఆ వైద్యుడు వెల్లడించాడు. ‘‘ధోని నన్ను సంప్రదించినందుకు రూ.20 ఫీజు తీసుకున్నా. మరో రూ.20 విలువైన ఔషధాలను అతనికి సూచించా. మొదట తనను గుర్తుపట్టలేదు. అతని సిబ్బంది ద్వారా తానే ధోని అని తెలిసింది. అతని తల్లిదండ్రులకు కూడా చికిత్స అందించా. వాళ్లు గత మూడు నెలలుగా నేను సూచించిన ఔషధాలు వాడుతున్నారు’’ అని వందన్‌ పేర్కొన్నాడు.