అన్న అక్కడ.. తమ్ముడు ఇక్కడ

దోహా: నికో.. ఇనాకి.. అన్నదమ్ములు! కానీ ఫిఫా ప్రపంచకప్‌లో వీళ్లు ఆడితే రెండు దేశాల అభిమానులు సంబరపడ్డారు. కారణం.. ఈ బ్రదర్స్‌ బరిలో దిగింది వేర్వేరు దేశాల తరఫున కాబట్టి! నికో, ఇనాకి పుట్టింది స్పెయిన్‌లో అయినా వాళ్ల తల్లిదండ్రులది ఘనా. అమ్మానాన్నను ఇచ్చిన దేశానికి ఒకరు.. తాము పుట్టిన దేశానికి మరొకరు ప్రాతినిధ్యం వహించారు. తన తొలి మ్యాచ్‌లో కోస్టారికాను 7-0తో చిత్తు చేసిన స్పెయిన్‌ జట్టులో తమ్ముడు నికో ఆడగా.. పోర్చుగల్‌ చేతిలో 2-3తో పోరాడి ఓడిన ఘనా జట్టుకు అన్నయ్య ఇనాకి ప్రాతినిథ్యం వహించాడు. ఫార్వర్డ్‌ స్థానంలో ఆడే వీళ్లిద్దరికి ఇదే తొలి ప్రపంచకప్‌. తనయులు ప్రపంచకప్‌లో వేర్వేరు దేశాలకు ఆడతారని నికో, ఇనాకి తల్లిదండ్రులు ఫెలిక్స్‌, మారియా విలియమ్స్‌ ఊహించి ఉండరు. 1990లో శరణార్థులుగా ఘనా నుంచి స్పెయిన్‌కు వలస వచ్చింది ఈ కుటుంబం. అప్పుడు మారియా గర్భవతిగా ఉంది. ఈ స్థితిలో వాళ్లు ఎన్నో ఇబ్బందులు పడ్డారు. బిల్బావోలో స్థిరపడ్డాక ఇనాకి, నికోలకు సాకర్‌పై ప్రేమ పుట్టింది. అదే వారిని ఈ ఆటలో రాటుదేలేలా చేసింది. ఆ తర్వాత అథ్లెటిక్‌ బిల్బావో క్లబ్‌కు కలిసి ఆడారు.