PBKS vs MI: ఆ సిక్స్‌ల వెనుక మర్మమిదే: ఇషాన్‌ కిషన్‌

ఇంటర్నెట్ డెస్క్: ఐపీఎల్ 2023 సీజన్‌లో (IPL 2023) ముంబయి ఇండియన్స్‌  పాయింట్ల పట్టికలో దూసుకొస్తోంది. ప్లేఆఫ్స్ అవకాశాలను మెరుగుపర్చుకుంటూ ముందుకు సాగుతోంది. తాజాగా పంజాబ్‌ కింగ్స్‌ను చిత్తు చేసి ఆరో స్థానంలో కొనసాగుతోంది. పంజాబ్‌ నిర్దేశించిన 215 పరుగుల లక్ష్య ఛేదనలో ముంబయి ఓపెనర్ ఇషాన్‌ కిషన్ చెలరేగిపోయాడు. కేవలం 41 బంతుల్లోనే 75 పరుగులు చేసి ముంబయి విజయంలో కీలక పాత్ర పోషించాడు. నాలుగు సిక్స్‌లు, ఏడు ఫోర్ల సాయంతో అదరగొట్టాడు. సూర్యకుమార్‌ యాదవ్‌తో కలిసి మూడో వికెట్‌కు 116 పరుగులు జోడించాడు.  ఈ క్రమంలో తన భారీ సిక్స్‌లు వెనుక  రహస్యమేంటో ఇషాన్‌ కిషన్‌ వెల్లడించాడు. పవర్ హిట్టింగ్‌ చేయాలంటే ఫిట్‌నెస్‌పై దృష్టిపెట్టాలనే నియమాలను గతంలో పట్టించుకోలేదని, సీనియర్ల నుంచి అనేక విషయాలను నేర్చుకున్నట్లు తెలిపాడు. 

‘‘ఫిట్‌నెస్‌ సాధించడానికి మనకు చాలా మంది సీనియర్లు రోల్‌ మోడల్స్‌ ఉన్నారు. వారిని చూసి కఠిన శిక్షణతో కృషి చేశా. మ్యాచ్‌లు ఉన్నా.. లేకపోయినా శ్రమించడాన్ని మాత్రం విరమించలేదు. అలాగే మనం ఇంట్లో ఏం తింటున్నామనేది కూడా చాలా కీలకం. అందుకు మా అమ్మకు ధన్యవాదాలు చెబుతున్నా. ఇక పంజాబ్‌తో మ్యాచ్‌ జరిగిన మొహాలీ వేదిక బ్యాటింగ్‌కు అనుకూలంగా ఉంది. చివరి వరకు క్రీజ్‌లో ఉంటే ఛేదన కష్టమేం కాదని తెలుసు. భారీ లక్ష్యం ఉన్నప్పుడు తొలి ఓవర్‌ నుంచి ఉన్న ఊపును చివరి బంతి వరకు కొనసాగించాలి’’ అని ఇషాన్‌ చెప్పాడు. ముంబయి జట్టులో అత్యధిక పరుగులు చేసిన జాబితాలో ఇషాన్‌ కిషన్‌ ముందున్నాడు. ఇప్పటి వరకు 9 మ్యాచులకుగాను 286 పరుగులు సాధించాడు. ముంబయి ఇండియన్స్ తన తదుపరి మ్యాచ్‌లో చెన్నై సూపర్ కింగ్స్‌తో చెపాక్‌ వేదికగా మే 6న తలపడనుంది.