గ్యాస్‌, విద్యుత్తు లేకుండానే పదార్థాల వేడి

ఆహార పదార్థాలను, పానీయాలను వేడి చేయాలంటే పొయ్యి ఉండాల్సిందే. కట్టెలు, బొగ్గు, కిరోసిన్‌, గ్యాస్‌.. ఇలాంటి ఇంధనాలను మండిస్తే గానీ మంట పుట్టదు. లేదూ విద్యుత్తు అయినా కావాలి. ఇవేవీ లేకుండా ఆహార పదార్థాలు వేడి అయితే? అదీ కేవలం నీటితోనే వేడి పుడితే? ఇలాంటి వినూత్న పరికరాలను ఐఐటీ దిల్లీ పరిశోధకులు రూపొందించారు. పవర్‌లెస్‌ హీటింగ్‌ సిస్టమ్‌ అని పిలుచుకునే ఇవి మారుమూల ప్రాంతాల్లో నివసించేవారికి బాగా పనికొస్తాయి. విద్యుత్తు సదుపాయం లేని చోట్ల, విద్యుత్తు ఉన్నా తరచూ అంతరాయం కలిగే చోట్ల, పొయ్యి ఏర్పాటు చేసుకోలేని పరిస్థితుల్లో తేలికగా వాడుకోవచ్చు. ఇందులో పదార్థాల కోసం, నీటి కోసం రెండు వేర్వేరు పెట్టెలుంటాయి. అలాగే వేడిని పుట్టించే హీటింగ్‌ పట్టీ ఉంటుంది. ఈ పట్టీలో పర్యావరణ హిత ఖనిజాలు, లవణాల మిశ్రమం ఉంటుంది. దీన్ని పరికరం అడుగు భాగాన ఉండే బాక్సులో పెట్టి, దానిపై నీరు పోయాలి. అంతే హీటింగ్‌ పట్టీ వెడెక్కటం మొదలెడుతుంది. దీని మీద పదార్థాల బాక్సును పెడితే చాలు. పదార్థాలు, పానీయాలు 60-70 డిగ్రీల సెల్షియస్‌ ఉష్ణోగ్రత వరకు వేడెక్కుతాయి. పరికరాలు చాలా తేలికగా ఉంటాయి. ఎక్కడికంటే అక్కడికి ఇట్టే తీసుకెళ్లొచ్చు. ఎక్కడైనా, ఎప్పుడైనా, ఎలాంటి వాతావరణాల్లోనైనా వాడుకోవచ్చు. తినటానికి సిద్దంగా ఉన్న పదార్థాలు, ఇన్‌స్టంట్‌ నూడుల్స్‌, టీ, కాఫీ వంటి వాటిని అప్పటికప్పుడు వేడి చేసుకోవచ్చు. ఒకసారి వాడిన తర్వాత పట్టీలో మిగిలిపోయే సహజ ఖనిజ మిశ్రమాన్ని ఎక్కడైనా పారేయొచ్చు. పర్యా వరణానికి ఎలాంటి హాని కలగదు. పైగా నేల సారమూ పెరుగుతుంది. గురుగావ్‌లోని ఆంచియేల్‌ టెక్నాలజీస్‌ అనే సంస్థ ఈ పరికరాల తయారీని ఆరంభించింది. నావికా దళానికి, కొన్ని ఆహార తయారీ సంస్థలకు వీటిని సరఫరా చేస్తోంది.