విపత్తుల అంచనాకు ఐఐటీ మండీ కొత్త ఆల్గోరిథమ్‌

ప్రకృతి విపత్తులు ఎప్పుడు సంభవిస్తాయో తెలియదు. వీటిని అంచనా వేయగలిగితే ఎక్కువ నష్టం కలగకుండా చూసుకోవచ్చు. ఇలాంటి ఉద్దేశంతోనే ఐఐటీ మండి పరిశోధకులు వినూత్న ఆల్గోరిథమ్‌ను రూపొందించారు. కృత్రిమ మేధ, మెషిన్‌ లెర్నింగ్‌ సాయంతో పనిచేసే ఇది ప్రకృతి విపత్తులను కచ్చితంగా అంచనా వేయటానికి తోడ్పడగలదు. దీన్ని కొండ చరియలు విరిగిపడటం మీద పరీక్షించారు కూడా. ఇది కొండ చరియలు విరిగిపడే అవకాశమున్న చోట డేటాను విశ్లేషించి, వాటిల్లో ఏవైనా తేడాలుంటే సవరించగలదు. వీటి ద్వారా పటాన్ని రూపొందించి, నిర్ణయాన్ని.. అంటే కొండ చరియలు విరిగిపడే అవకాశాన్ని అంచనా వేయగలదు. దీన్ని వరదలు, మంచు ఫలకాలు విరగటం వంటి విపత్తులను అంచనా వేయటానికీ ఉపయోగించుకోవచ్చని భావిస్తున్నారు.