బెయిల్‌ పిటిషన్లు సెషన్స్‌ కోర్టులో దాఖలు చేసుకోండి

ఫోన్‌ ట్యాపింగ్‌ నిందితులకు నాంపల్లి కోర్టు సూచన

ఈనాడు, హైదరాబాద్‌: ఫోన్‌ ట్యాపింగ్‌ కేసులో నిందితులు తమ బెయిల్‌ పిటిషన్లను సెషన్స్‌ కోర్టులో దాఖలు చేసుకోవాలని నాంపల్లి కోర్టు సూచించింది. దీంతో నిందితులు ప్రణీత్‌రావు, తిరుపతన్న తమ బెయిల్‌ పిటిషన్లను వెనక్కి తీసుకున్నారు. ఈ కేసులో నలుగురిపై పలు సెక్షన్ల కింద పంజాగుట్ట పోలీసులు కేసు నమోదు చేశారు. సెక్షన్‌ 70 ఐటీ యాక్ట్‌ కేసు నమోదు చేయడంతో ఒక్కొక్కరికీ పదేళ్ల శిక్ష పడే అవకాశం ఉన్నందున సెషన్స్‌ కోర్టుకు వెళ్లాలని నాంపల్లి ఏసీఎంఎం కోర్టు సూచించింది. దీంతో నాంపల్లిలో వేసిన బెయిల్‌ పిటిషన్లను నిందితులు ఉపసంహరించుకున్నారు. మంగళవారం సెషన్స్‌ కోర్టులో వాటిని దాఖలు చేయనున్నారు. మరోవైపు కేసులో ఏ1గా ఉన్న రాధాకిషన్‌రావు రిమాండ్‌ ఏప్రిల్‌ 12న ముగియగా.. మరికొన్ని రోజులకు పొడిగిస్తున్నట్టు కోర్టు ఉత్తర్వులిచ్చిన సంగతి తెలిసిందే.