కారులో తరలిస్తున్న రూ.1.50 కోట్ల స్వాధీనం

నవాబుపేట, న్యూస్‌టుడే: వికారాబాద్‌ జిల్లా నవాబ్‌పేట మండలంలో ఎన్నికల నియమావళికి విరుద్ధంగా కారులో తరలిస్తున్న రూ.1.50 కోట్ల నగదును పోలీసులు స్వాధీనం చేసుకున్నారు. ఎస్సై భరత్‌భూషణ్‌ తెలిపిన వివరాల ప్రకారం.. మైతాబ్‌ఖాన్‌గూడ వైపు నుంచి వస్తున్న టీఎస్‌09ఈక్యూ0004 నంబరు కారును శుక్రవారం సాయంత్రం పోలీసులు మండల కేంద్రంలోని పులుమామిది చౌరస్తా వద్ద తనిఖీ చేశారు. ఎన్నికల నియమావళికి విరుద్ధంగా ఎలాంటి ఆధారాలు లేకుండా తరలిస్తున్న రూ.1.50 కోట్ల నగదు ఉండటంతో స్వాధీనం చేసుకున్నారు. కారులో డ్రైవర్‌తోపాటు రంగారెడ్డి జిల్లా మోఖిలకు చెందిన స్థిరాస్తి వ్యాపారి రవీందర్‌రావు ఉన్నట్లు గుర్తించామన్నారు. ఈ మేరకు కేసు నమోదు చేశామని తెలిపారు.