గృహమే కదా పర్యావరణ సీమ

విడ్డూరం-ఆశ్చర్యం

గృహమే కదా పర్యావరణ సీమ

ఇక ప్రకృతి హిత నివాసాల హవా

ఈ ఇళ్లు...వాటంతట అవే గాల్లోంచి నీటిని తయారుచేసుకుంటాయి..మురుగు నీటిని మంచి నీటిగా మార్చేస్తాయి..మండే ఎండల్లో కూడా మంచులా చల్లగా పలకరిస్తాయి..అమ్మో అవి ఇళ్లా...మయా మహళ్లా అనుకుంటున్నారు కదా!
కాదు.. పర్యావరణానికి మేలుచేసే సస్టెయినబుల్‌ హౌస్‌ నిర్మాణాలివి తమిళనాడులోని ఓ అంకుర సంస్థ ఈ ఇళ్ల నిర్మాణాన్ని చేపడుతోంది..
అదేదో ప్రకటనలో చెప్పినట్టుగా ‘భారతదేశం నిరంతరం నిర్మాణాలు జరిగే దేశం’. మరి ఈ నిర్మాణాలన్నీ పర్యావరణ మార్పులను దృష్టిలో పెట్టుకునే జరుగుతున్నాయా అనేది ప్రశ్న? ఇప్పుడిప్పుడు ఆ దిశగా ఆలోచనలు జరుగుతున్నాయనడానికి తమిళనాడులోని సిటీరెనె సంస్థ చేపడుతున్న నిర్మాణాలే ఉదాహరణ. పర్యావరణ మార్పుల కారణంగా భవిష్యత్తులో తీవ్రమైన నీటికొరత తలెత్తుతుంది. అధిక ఉష్ణోగ్రతలు నమోదవుతాయి. ఈ మార్పులని దృష్టిలో పెట్టుకునే సిటీరెనె భవన నిర్మాణాలని చేపడుతోంది. మామూలు భవన నిర్మాణాలతో పోలిస్తే ఇవి చాలా భిన్నంగా ఉంటాయి. నిర్మాణాల్లో వాడే మెటీరియల్స్‌ కూడా.. రీసైక్లింగ్‌ చేసినవి, పరిశ్రమల్లోంచి వచ్చిన వ్యర్థాలతోనే ఈ నిర్మాణాలని చేపడుతున్నారు. పరిశ్రమల్లోంచి వ్యర్థాలుగా వచ్చే జీఎఫ్‌ఆర్‌జీ, ఏఏసీ బ్లాకులని ఈ నిర్మాణాల్లో ప్రధానంగా ఉపయోగిస్తున్నారు. ఏఏసీ అంటే ఆటోక్లావ్డ్‌ ఎయిరేటెడ్‌ కాంక్రీట్‌. వీటితో చేసిన బ్లాకులు మామూలు భనవనిర్మాణ సామగ్రితో పోల్చినప్పుడు చాలా తక్కువ బరువుతో ఉంటాయి. చెక్క, సిమెంట్‌, ఇసుక, నీరు వంటి వాటికి ప్రత్యామ్నాయంగా వీటిని ఉపయోగిస్తారు. ఈ బ్లాక్స్‌ని ఉపయోగించడం వల్ల అగ్నిప్రమాదాలు జరిగే ఆస్కారం చాలా తక్కువ. అలాగే ఇంటిలోపల తక్కువ ఉష్ణోగ్రతలు నమోదవుతాయి. దాంతో ఏసీలు, ఫ్యాన్ల వినియోగం బాగా తగ్గుతుంది. ఈ విధానంలో భూ ఉష్ణోగ్రతలని తగ్గించుకుని పర్యావరణపరంగా జరిగే కాలుష్యం తగ్గించుకోవచ్చుని అంటున్నారు తయారీదారులు.

రసాయనాలు లేని పంటలు పండించుకోవచ్చు...
ఈ ఇళ్లపై సౌరఫలకాలను ప్రత్యేకంగా ఏర్పాటు చేస్తున్నారు. వీటిని నుంచి విద్యుత్‌ అవసరాలు తీర్చుకోవడంతోపాటు...గాల్లోని తేమ నుంచి నీటిని తయారుచేసుకోవచ్చు. ఈ నీటిని ఇంటి అవసరాలకు వాడుకోవచ్చు. లేదంటే పైభాగంలో ఏర్పాటు చేసిన మిద్దెతోటకు తరలించుకునే ఏర్పాట్లు ఉన్నాయి. వెనకభాగంలో ఏర్పాటు చేసిన బయోడైజెస్టర్ల సాయంతో ఇంట్లో వివిధ అవసరాలకు కోసం ఉపయోగించిన నీటిని రీసైక్లింగ్‌చేసి తిరిగి ఉపయోగించుకునే విధంగా ఇంటి నిర్మాణాల్లో ప్రత్యేకమైన ఏర్పాట్లు చేస్తారు. మొత్తం మీద సొంతంగా ఇంట్లోనే కాయగూరలు పండించుకుంటూ, నీటిని తోడుకుంటూ, విద్యుత్‌ని తయారుచేసుకోవచ్చన్నమాట. అందుకే ఈ ఇళ్లని సెల్ఫ్‌ సస్టెయినబుల్‌ హౌసెస్‌ అని అంటున్నారు. ఇంతకీ ఈ ఆలోచన ఎలా వచ్చింది... ఎవరికి వచ్చింది?

నివేదిత, దిలీపన్‌

నీటి కటకట నుంచి వచ్చిన ఆలోచన...
ఆ మధ్య చెన్నైకి పెద్ద ఎత్తున వరదలు వచ్చిన విషయం గుర్తుందా? దిలీపన్‌ ఇల్లు కూడా ఆ వరదల్లోనే చిక్కుకుపోయింది. ఆ సమయంలో ఇంట్లో కరెంట్‌ లేదు. తాగడానికి మంచి నీళ్లులేవు. ఎటుచూసినా వరదనీరే. కొన్ని రోజులకు ఆ వరదనీరంతా ఏమయిపోయిందో తెలియదు కానీ ఎండాకాలం వచ్చేసరికి చెన్నైలో తాగడానికి గుక్కెడు నీళ్లు కూడా లేవు. గ్లాసుడు నీళ్లు కూడా దొరకని పరిస్థితి. ఈ పరిస్థితి దిలీపన్‌ని బాగా ఆలోచింపచేసింది. ప్రకృతి విపత్తులు వచ్చినా, పర్యావరణం కారణంగా భవిష్యత్తులో ఇబ్బందులు తలెత్తినా తట్టుకునే ఇంటినిర్మాణాలు చేపట్టాలని ఆయన అనుకున్నారు. నివేదిత అనే తన స్నేహితురాలితో కలిసి ప్రపంచవ్యాప్తంగా ఊపందుకుంటున్న సస్టెయినబుల్‌ నిర్మాణాల గురించి ఆలోచన చేశారు. ఫలితమే ఇప్పుడు మనం చూస్తున్న ఈ నిర్మాణాలు. కోవలం, ఆయపాక్కమ్‌, సెంగట్టూరు, మదంబాక్కమ్‌ వంటి చోట్ల ఈ నిర్మాణాలని మనం చూడొచ్చు.

రసాయన ఎరువుల తయారీలో భాగంగా పెద్దఎత్తున ఫాస్ఫో- జిప్సమ్‌ వ్యర్థాలు మిగిలిపోతుంటాయి. మన దేశంలో రోజుకి రెండు వేల కిలోల వంతున ఏడాదికి ఏడులక్షల టన్నులుగా ఇది పేరుకుపోతోందని ఓ అంచనా. కొన్ని ఎరువుల ఫ్యాక్టరీల బయట ఓ చిన్నసైజు పర్వతంలాగే ఈ వ్యర్థాలు కనిపిస్తుంటాయి. దీనివల్ల చుట్టుపక్కల భూములు కలుషితమవుతాయి. ఈ ఫాస్ఫో- జిప్సమ్‌కి అతిసన్నటి గాజుతీగల్ని కలపడం ద్వారా దృఢమైన ఫలకాల్ని తయారుచేసేదే జీఎఫ్‌ఆర్‌జీ సాంకేతికత. అలా తయారైన ఫలకాల్నే పెద్దరెడీమేడ్‌ గోడలుగా తయారుచేసి నిలబెడతారు.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

విడ్డూరం-ఆశ్చర్యం

మరిన్ని

రుచులు

App