Hyderabad: హైదరాబాద్‌లో ప్రైవేటు ట్రావెల్స్‌ బస్సు పూర్తిగా దగ్ధం

ప్రైవేటు ట్రావెల్స్‌ బస్సులో ఆకస్మాత్తుగా మంటలు వ్యాపించి పూర్తిగా దగ్ధమైంది. హైదరాబాద్‌ బాలానగర్‌లో శుక్రవారం సాయంత్రం ఈ ప్రమాదం చోటు చేసుకుంది. సుచిత్ర నుంచి కూకట్‌పల్లి వైపు వెళ్తున్న బస్సు ఐడీపీఎల్‌ సమీపంలోకి రాగానే.. ఇంజిన్‌ నుంచి పొగలు వచ్చాయి. దీంతో అప్రమత్తమైన డ్రైవర్‌ వెంటనే బస్సును నిలిపేసి కిందికి దిగాడు.  క్షణాల్లో మంటలు వ్యాపించి బస్సు పూర్తిగా దగ్ధమైంది. సమాచారం అందుకున్న అగ్నిమాపక సిబ్బంది ఘటనాస్థలికి చేరుకొని మంటలను ఆర్పేశారు. బస్సు నిలిపిన చోట పెట్రోల్‌ బంకు ఉండడంతో స్థానికులు, వాహనదారులు ఆందోళనకు గురయ్యారు.