భరత్‌ అను...

అవీ ఇవీ...

భరత్‌ అను...

‘‘పంత్‌కు ప్రత్యామ్నాయ వికెట్‌ కీపర్లపై ప్రత్యేక శ్రద్ధ పెట్టాం. మా దృష్టిలో ముగ్గురు యువ ఆటగాళ్లున్నారు’’... ఇవీ కొన్ని రోజుల కిందట భారత సెలక్షన్‌ కమిటీ ఛైర్మన్‌ ఎమ్మెస్కే ప్రసాద్‌ చెప్పిన మాటలు. ఆ ముగ్గురిలో ఒక తెలుగు కుర్రాడు కూడా ఉన్నాడన్న సంగతి చాలామందికి తెలియదు. అతడి పేరు.. కోన శ్రీకర్‌ భరత్‌. పంత్‌పై పెట్టుకున్న అంచనాలు దారితప్పడంతో ప్రత్యామ్నాయ వికెట్‌ కీపర్లపై దృష్టిసారించిన సెలక్టర్ల దృష్టిని ఆకర్షిస్తున్నాడు 25 ఏళ్ల ఈ విశాఖపట్నం కుర్రాడు. రంజీలతో పాటు భారత్‌-ఎ తరఫున మ్యాచ్‌ల్లో అతడి జోరు మామూలుగా లేదు. ఇంతకీ ఈ భరత్‌ నేపథ్యమేంటి? గల్లీ క్రికెట్‌ నుంచి ఈ స్థాయికి అతనెలా చేరగలిగాడు? తెలుసుకోవాలని ఉందా? అయితే చదివేయండి!

భరత్‌.. క్రికెటర్‌గా ఎదగడానికి కారణం అతడి తండ్రి శ్రీనివాస రావు. ఆయనకు క్రికెట్‌ అంటే ఎంతో ఇష్టం. ఇంటి దగ్గర చుట్టుపక్కల పిల్లలతో కలిసి ఆడుతున్న భరత్‌ ఆసక్తిని ఆయన గమనించాడు. కోచ్‌ కృష్ణారావు దగ్గర శిక్షణలో చేర్పించాడు. రోజూ శిక్షణకు తీసుకెళ్తూ ఉండేవాడు. అలా ఎనిమిదేళ్ల వయసులో భరత్‌ క్రికెట్‌ ప్రస్థానం మొదలైంది. మొదటి నుంచి బంతిని బాదడంపై పూర్తి దృష్టి పెట్టిన అతను శిక్షణలో చేరిన తర్వాత కోచ్‌ సూచనలతో త్వరగానే రాటుదేలాడు. పదేళ్ల వయసులోనే అండర్‌-13 రాష్ట్ర జట్టుకు ఎంపికై సత్తాచాటాడు. అక్కడి నుంచి అతని పరుగుల దాహం.. క్రికెట్‌ ప్రయాణం నిర్విఘ్నంగా సాగుతోంది.

మొదట వికెట్‌కీపర్‌ కాదు..
ప్రస్తుతం వికెట్‌ కీపర్‌ బ్యాట్స్‌మన్‌గా జాతీయ జట్టులో స్థానానికి పోటీపడుతున్న భరత్‌.. తన కెరీర్‌ను వికెట్‌ కీపర్‌గా మొదలు పెట్టలేదు. ముందు అతను బ్యాట్స్‌మన్‌ మాత్రమే. అయితే ఫీల్డింగ్‌లో చురుకుదనం, బంతిని ఒడిసిపట్టే విధానం, త్వరగా స్పందించే తీరు చూసి కోచ్‌ అతణ్ని కీపర్‌గా మార్చాడు. మొదట్లో కొన్ని ఓవర్ల పాటు కీపింగ్‌ చేసిన అతను తర్వాత పూర్తిస్థాయి వికెట్‌ కీపర్‌గా జట్టులో స్థిరపడ్డాడు. తొలిసారిగా అండర్‌-19 మ్యాచ్‌లో అతను ఆంధ్ర తరపున వికెట్‌కీపింగ్‌ చేశాడు. 2012 డిసెంబర్‌లో ఆంధ్ర రంజీ జట్టులో చోటు దక్కించుకున్నాడు. 2014-15 సీజన్‌ రంజీ ట్రోఫీలో భాగంగా గోవాపై త్రిశతకం (308) చేసి ఆ ఘనత సాధించిన తొలి వికెట్‌ కీపర్‌గా చరిత్ర సృష్టించాడు. గత 14 నెలల్లో భారత-ఎ తరపున 14 అనధికార టెస్టులాడిన భరత్‌... మూడు శతకాల సాయంతో 759 పరుగులు చేశాడు. వికెట్‌ కీపింగ్‌లో 48 క్యాచ్‌లు అందుకోవడంతో పాటు ఆరు స్టంపౌట్లు చేశాడు.

ద్రవిడ్‌ మాటలు.. ఎమ్మెస్కే ప్రోత్సాహం..
భారత్‌-ఎ కోచ్‌గా రాహల్‌ ద్రవిడ్‌ గత కొన్నేళ్లలో ఎంతోమంది కుర్రాళ్లను తీర్చిదిద్దాడు. వారిలో స్ఫూర్తి రగిలించాడు. అందులో భరత్‌ ఒకడు. ‘‘ద్రవిడ్‌ సార్‌తో మాట్లాడడం కొద్దిసేపే అయినా ఆ మాటలు ఎంతో మేలు చేస్తాయి. వచ్చిన అవకాశాన్ని పూర్తిగా సద్వినియోగం చేసుకోమనే చెప్తాడు. మీలో నైపుణ్యాలు ఉంటేనే కదా ఇంత దూరం వచ్చేది అని స్ఫూర్తి రగిలిస్తాడు. మనం చేయాల్సిన పని ఏమిటి? దాన్ని పూర్తి చేసేందుకు ఉన్న అవకాశాలు.. వాటిని మనం ఎలా అందుకోవాలో వివరిస్తాడు. ఆయనలా ఆలోచించడాన్ని అలవాటు చేసుకున్నా. జట్టు కఠిన పరిస్థితుల్లో ఉన్నపుడు క్రీజులో అడుగుపెడితే ద్రవిడ్‌ ఆటను ఊహించుకొని.. మెరుగ్గా ఆడడం కోసం ప్రయత్నిస్తున్నా’’ అని అతను చెప్పాడు. మరోవైపు ప్రస్తుత టీమ్‌ఇండియా ప్రధాన సెలక్టర్‌ ఎమ్మెస్కే ప్రసాద్‌ ప్రోత్సాహం ఎన్నడూ మర్చిపోలేనని భరత్‌ తెలిపాడు. ‘‘నాకు పన్నెండేళ్ల వయసునప్పటి నుంచి ప్రసాద్‌ అన్నను చూస్తూ పెరిగా. అతని వికెట్‌ కీపింగ్‌ను అనుకరించా. నాలో స్ఫూర్తి నింపిన ఆటగాళ్లలో అతను ఒకరు. ఎప్పుడూ వెన్నుతట్టి ప్రోత్సహిస్తూనే ఉంటాడు’’ అని భరత్‌ తెలిపాడు.

‘‘భారత జట్టులో చోటు కోసం పోటీ తీవ్రంగా ఉంది. అయితే నా ఆట మీద పూర్తి ఆత్మవిశ్వాసంతో ఉన్నా. నేను ఎవరికీ పోటీ కాదు. జట్టులో స్థానం ఆశిస్తున్న వాళ్లు 50 కొడితే.. నేను వంద చేయాలి. వాళ్లు సెంచరీ సాధిస్తే.. నేను 150 కొట్టాలి. ఇదే నేను నమ్మే సిద్ధాంతం. ఎందుకంటే కష్టపడకుండా ఫలితం ఆశించడం సరికాదు. ఒకవేళ అలాంటి ఫలితం వచ్చినా అది ఎక్కువ కాలం నిలవదు. ఇది నా వ్యక్తిత్వం. కొన్నేళ్లుగా రంజీల్లో ఆడుతున్నా. తర్వాతి స్థాయికి చేరాలంటే మానసికంగా బలంగా ఉండాలి. దేశవాళీలతో పాటు భారత్‌-ఎ తరపున మెరుగ్గా ఆడుతున్నా. ఆస్ట్రేలియా, శ్రీలంక, ఇంగ్లాండ్‌ దేశాల్లో శతకాలు సాధించా. ఇదే ఫామ్‌ కొనసాగించాలి’’

- కె.ఎస్‌.భరత్‌

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

అవీ ఇవీ...

మరిన్ని

రుచులు

App