డబ్బింగ్‌: నానీ వాయిస్‌ ఓవర్‌: మహేష్‌!

తాజావార్తలు

డబ్బింగ్‌: నానీ వాయిస్‌ ఓవర్‌: మహేష్‌!
మణిరత్నం తీసిన ‘ఓకే బంగారం’ చూస్తే మమ్ముట్టి తనయుడు దుల్కర్‌ సల్మాన్‌ నటన కట్టిపడేస్తుంది. కానీ జాగ్రత్తగా గమనిస్తే అతడి మాటల్లో నానీ గొంతు వినిపిస్తుంది. ‘గుండె జారి గల్లంతయ్యిందే’లో ఇషా తల్వార్‌ మాట్లాడుతుంటే ఆ స్వరంలో నిత్యామేనన్‌నే కనిపిస్తుంది. నానీ, నిత్యా అనే కాదు, నటీనటులుగా పేరున్న ఇంకొందరు ప్రముఖులూ ఇతర సినిమాల కోసం తమ గొంతుని అరువిస్తున్నారు. డబ్బింగ్‌ కళాకారులుగా, వాయిస్‌ ఓవర్‌ ఆర్టిస్టులుగా మారి, సినిమాలను మరో మెట్టు పైకెక్కిస్తున్నారు.

సినిమా వాళ్లకు నటనే కాదు, గొంతులూ ప్రత్యేకమే. డైలాగులు పలకడంలో, పదాల్ని విరవడంలో ఎవరి శైలి వాళ్లది. అందుకే మొహాల్ని చూడకపోయినా, గొంతు వినగానే అది ఫలానా వ్యక్తిదని ఠక్కున చెప్పేయొచ్చు. నానీ, నిత్యామేనన్‌, కలర్స్‌ స్వాతి, ఛార్మి లాంటి వాళ్లకు తమ సినిమాల్లో డబ్బింగ్‌కూ చాలాసార్లు మంచి మార్కులే పడ్డాయి. అలాంటి వాళ్ల గొంతును తమ సినిమాలకు ఉపయోగించుకుంటే బావుంటుందని దర్శక నిర్మాతలకూ అనిపించడం సహజం. నానీ గొంతుని ఎంతగానో ఇష్టపడే మణిరత్నంకి కూడా ‘ఓకే బంగారం’ సినిమా తీస్తున్నప్పుడు ఆ వాయిస్‌ని తన సినిమా కోసం వాడుకుంటే బావుంటుందని అనిపించింది. మణిరత్నం అడగ్గానే నానీ కూడా వెంటనే ఒప్పుకున్నాడు. అలా మమ్ముట్టి కొడుకు దుల్కర్‌ సల్మాన్‌కు తెలుగులో తొలిసారి డబ్బింగ్‌ చెప్పాడు నానీ. తరవాత అతడి డబ్బింగే సినిమాకి బలమైందని మణిరత్నమే అన్నారు. గతంలో నితిన్‌ సినిమా ‘దిల్‌’ సంచలన విజయాన్ని అందుకుంది. దాని వెనక అప్పట్లో బిజీగా ఉన్న హీరో శివాజీ గొంతు కూడా ఉంది. ‘దిల్‌’లో నితిన్‌కి డబ్బింగ్‌ చెప్పి, నంది అవార్డునూ అందుకున్నాడు శివాజీ. ‘100% లవ్‌’తో మంచి గుర్తింపు తెచ్చుకుని, చిన్న సినిమాల్లో హీరోగా, నటుడిగా రాణిస్తున్నాడు నందూ. ‘సైజ్‌ జీరో’ సినిమాతో అతడు డబ్బింగ్‌ ఆర్టిస్ట్‌గానూ మారాడు. అందులో హీరో ఆర్యకు గొంతునిచ్చింది నందూనే. ‘బ్రదర్స్‌’ సినిమాలో ఇద్దరు సూర్యల్లో ఒకరికి తమిళ నటుడు కార్తీనే డబ్బింగ్‌ చెప్పాడు. ఇటీవల స్టివెన్‌ స్పీల్‌బర్గ్‌ తీసిన ‘బీఎఫ్‌జీ’ అనే ఇంగ్లిష్‌ సినిమాలో హీరో పాత్రకు జగపతిబాబు గొంతు అందించడం విశేషం.

ఇద్దరికీ నిత్యామేననే
తెలుగమ్మాయి కాకపోయినా, మొదట్నుంచీ సొంతంగా డబ్బింగ్‌ చెప్పుకుంటూ నటనతో పాటు గొంతుకూ గుర్తింపు తెచ్చుకున్న తార నిత్యామేనన్‌. ఆ మాటలకు ముచ్చటపడే ‘గుండె జారి గల్లంతయ్యిందే’ సినిమాలో ఇషా తల్వార్‌కు కూడా నిత్యతోనే డబ్బింగ్‌ చెప్పించాడు దర్శకుడు. ఆ సినిమాలో మొదటి హీరోయిన్‌గా నిత్యా, మరో హీరోయిన్‌గా ఇషా నటిస్తే, రెండు పాత్రలకూ నిత్యే డబ్బింగ్‌ చెప్పడం విశేషం. రెంటిలోనూ తేడా స్పష్టంగా తెలిసేలా, మరో పాత్రకు కాస్త గొంతు మార్చి డబ్బింగ్‌ చెప్పింది. ‘జల్సా’లో భాగీగా ఇలియానాకూ మంచి పేరొచ్చింది. మాటల్లో అమాయకత్వం కొట్టొచ్చేలా కనిపించే ఆ పాత్రకు గొంతునిచ్చింది కలర్స్‌ స్వాతి. ‘చందమామ’ సినిమాలో నాగబాబు గారాలపట్టిగా కాజల్‌ అగర్వాల్‌ అల్లరిని అంత త్వరగా మరచిపోలేరు. నిజానికి ఆ హావభావాలు మాత్రమే కాజల్‌వి. వాటి వెనకున్న గొంతు మరో హీరోయిన్‌ ఛార్మిది. అత్త పాత్రల్లో అదరగొడుతున్న నదియా సెకండ్‌ ఇన్నింగ్స్‌ తెలుగులో మొదలైంది ‘మిర్చి’తోనే. ఆ సినిమాలో నదియా నటనకు రాశి గొంతు తోడవబట్టే పాత్ర అంతలా పండింది. ఒకప్పుడు ‘గీతాంజలి’ సినిమాలో ‘లేచిపోదాం అన్న మొనగాడా రా చూద్దాం’ అంటూ గిరిజ చేసిన సందడి ఎప్పటికీ గుర్తుండిపోతుంది. ఆ గొంతు నటి రోహిణిది అన్న విషయం మాత్రం చాలా మందికి తెలీదు. ‘అలా మొదలైంది’, ‘నేనూ శైలజ’, ‘బాహుబలి’ లాంటి సినిమాలతో తెరపైనా మెప్పిస్తోన్న రోహిణి, ‘శివ’ సినిమాలో అమల, ‘బొంబాయి’లో మనీషా కొయిరాలా, ‘రావన్‌’లో ఐశ్వర్యారాయ్‌ లాంటి వాళ్లకు డబ్బింగ్‌ చెప్పింది. ‘బ్రూస్‌లీ’ సినిమాలో కృతీ కర్బందా గొంతు మరో నటి మధు శాలినిది.

‘జల్సా’కి మహేష్‌...
కొన్ని సినిమాలకు కథతో పాటు ఆ కథ నేపథ్యాన్నీ వివరించడానికి ఎవరో ఒకరు కావాలి. అందరికీ బాగా తెలిసిన గొంతైతే వాళ్లు చెప్పే విషయంపైన ప్రేక్షకులు ఎక్కువ దృష్టిపెడతారు. దానివల్ల కథ కూడా సులువుగా తలకెక్కుతుంది. అదే సూత్రంతో పవన్‌ కల్యాణ్‌ సినిమాకు, సూపర్‌స్టార్‌ మహేష్‌బాబుతో వాయిస్‌ ఓవర్‌ చెప్పించాడు త్రివిక్రమ్‌. ‘జల్సా’ సినిమా మొదలు నుంచీ ముగింపు వరకూ చాలాసార్లు మహేష్‌ వెనక నుంచి కథ చెబుతూనే ఉంటాడు. ఆ తరవాత ఎన్టీఆర్‌ సినిమా ‘బాద్‌షా’కీ అలానే గొంతు అరువిచ్చాడు మహేష్‌. ఎన్టీఆర్‌ ఏమీ తక్కువ తినలేదు, రామ్‌ నటించిన ‘రామరామ కృష్ణకృష్ణ’ సినిమాకు అలానే తన గొంతులో కథ నేపథ్యాన్ని వినిపించాడు. యువనటుడు రాజ్‌తరుణ్‌ మాట్లాడే శైలికి తక్కువ కాలంలోనే మంచి గుర్తింపొచ్చింది. అందుకే నాగశౌర్య నటించిన ‘అబ్బాయితో అమ్మాయి’, ‘లక్ష్మీ రావే మా ఇంటికి’ సినిమాలకు అతడితో వాయిస్‌ ఓవర్‌ చెప్పించారు. ‘మర్యాద రామన్న’ సినిమాలో సునీల్‌ సైకిల్‌ రూపంలో తన గొంతు వినిపించిన రవితేజ, ‘దూసుకెళ్తా’ సినిమాకూ వాయిస్‌ ఓవర్‌ ఇచ్చాడు. ప్రభాస్‌, రామ్‌, సునీల్‌, నారా రోహిత్‌ లాంటి వాళ్లూ వివిధ సందర్భాల్లో తమకు సంబంధం లేని సినిమాల్లో గొంతు వినిపించిన వాళ్లే. ఏదేమైనా పరిశ్రమలో అందం, నటనకే కాదు, తారల కంఠ స్వరాలకూ మంచి గిరాకీ ఉందన్న మాట.

FileName

  • FileName
మరిన్ని
FileName
FileName

  • FileName
మరిన్ని
FileName

  • FileName
మరిన్ని

  • FileName
మరిన్ని

  • FileName
మరిన్ని

  • FileName
మరిన్ని

  • FileName
మరిన్ని
జిల్లా వార్తలు
Property Handling 300x50

దేవ‌తార్చ‌న

రుచులు

© 1999- 2016 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.