ఆరోగ్యం కోసం మీరేం చేస్తున్నారు?

ఇస్లాం సందేశం

ఆరోగ్యాన్ని కాపాడుకోవడం కూడా దైవారాధనతో సమానమన్నారు ప్రవక్త మహనీయులు. ఆరోగ్యవరాన్ని గురించి తీర్పు దినం నాడు అల్లాహ్‌ ప్రశ్నిస్తాడని ప్రవక్త (స) హెచ్చరించారు. ఆరోగ్యాన్ని పాడుచేసే అన్ని రకాల ఆహార పదార్థాలకు దూరంగా ఉండాలని చెప్పారు. మత్తుపదార్థాలను అల్లాహ్‌ నిషేధించారు. మద్యం, మత్తు పదార్థాలు తీసుకోవడాన్ని దివ్య ఖుర్‌ఆన్‌ తీవ్రంగా పరిగణిస్తుంది. ఆరోగ్యాన్ని కాపాడుకోవడం దినచర్యలో భాగమవ్వాలని మహనీయులు ఉద్బోధించారు.

ఆహారపుటలవాట్లను పాటించడం వల్ల మంచి ఆరోగ్యం మన సొంతమవుతుంది. రోగాలతో పోరాడే శక్తి పెరుగుతుంది. తేనె, పాలు, ఖర్జూరం మన ఆహారంలో భాగం కావాలి, ప్రకృతి సిద్ధంగా లభించే పండ్లు, ఫలాలు, కాయగూరలు ఎక్కువగా తినాలని ప్రవక్త(స) చెప్పారు. ఆయన ప్రతి సోమ, గురువారాలు ఉపవాసాలు చేసేవారు. ప్రతి నెలా 13, 14, 15 తేదీల్లో క్రమం తప్పకుండా దీక్షను పాటించేవారు. కేవలం రమజాన్‌ నెలలోనే కాక నెలలో కనీసం మూడు ఉపవాసాలు పాటించడం అలవర్చుకుంటే మంచి ఆరోగ్యం మన సొంతమవుతుందని ఆయన చెప్పేవారు. ఈ ప్రక్రియ వల్ల జీర్ణశక్తి పెరుగుతుంది. శరీరంలోని విష పదార్థాలు బయటికి వెళ్లిపోతాయి. చెడ్డ కొవ్వు కరిగిపోతుంది. ఎన్నో రోగాల నుంచి మనల్ని మనం కాపాడుకోవచ్ఛు

మన ఉదరమే రోగాలకు పుట్టిల్లు. కడుపునిండా తినడం వల్ల ఎన్నో రోగాలను కొని తెచ్చుకుంటున్నాం. పొట్టను మూడు భాగాలు చేసి ఒక్క భాగమే ఆహారంతో నింపాలని ప్రవక్త (స) చెప్పారు. మంచినీరు, వాయువుతో మరో రెండు భాగాలు నింపాలని అనేవారు. మనిషి నిటారుగా నిల్చోవడానికి కొన్ని ముద్దలు తింటే సరిపోతుందని ప్రవక్త (స) చెప్పారు. బతకడానికే తినాలి గానీ తినడానికి బతకకూడదన్నది అల్లాహ్‌ ఉపదేశం. ఇదే ఆరోగ్య రహస్యం.

- ఖైరున్నీసాబేగం

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి