బ్రెడ్‌ పుడ్డింగ్‌... పసందుగా!

ఇంట్లో బ్రెడ్‌ ఉంటే... గబగబా శాండ్‌విచ్‌ లేదా బ్రెడ్‌ ఆమ్లెట్‌ చేసుకుని తినేయడంలో కొత్తేంలేదుగా. అందుకే ఈసారి కాస్త వెరైటీగా స్నాక్స్‌, స్వీట్స్‌ ప్రయత్నిద్దాం. చేసుకోవడం సులువే కాదు, రుచీ అదిరిపోతుంది. 

కావలసినవి: చక్కెర: ముప్పావుకప్పు, నీళ్లు: మూడుచెంచాలు, బ్రెడ్‌  స్లైసులు: నాలుగు, చిక్కని పాలు: కప్పు, కస్టర్డ్‌పౌడర్‌: మూడు చెంచాలు, కరిగించిన నెయ్యి: చెంచా.
తయారీ: ముందుగా కారమిల్‌ చేసుకోవాలి. పాన్‌లో పావుకప్పు చక్కెర, నీళ్లు తీసుకుని పొయ్యిమీద పెట్టాలి. చక్కెర కరిగి... పాకం గోధుమరంగులోకి మారుతున్నప్పుడు దింపేసి ఓ నెయ్యిరాసిన గిన్నెలోకి పోసుకోవాలి. పాలను ఓ గిన్నెలోకి తీసుకుని స్టౌమీద పెట్టాలి. పాలు మరుగుతున్నప్పుడు మిగిలిన చక్కెర కొద్దిగా నీటిలో కలిపి కస్టర్డ్‌పొడి వేసి బాగా కలిపి మంట తగ్గించాలి. పాలు చిక్కగా అవుతున్నప్పుడు బ్రెడ్‌పొడి వేసి కలపాలి. ముద్దలా అయ్యాక ఈ మిశ్రమాన్ని చక్కెరపాకం వేసిన గిన్నెలో వేసి పైన అల్యుమినియం ఫాయిల్‌ చుట్టేసి ఆవిరిమీద అరగంట సేపు ఉడికించి తీసుకోవాలి. ఈ మిశ్రమం చల్లగా అయ్యాక రెండుగంటలసేపు ఫ్రిజ్‌లో ఉంచి తీసుకోవాలి. 

కావలసినవి: బ్రెడ్‌స్లైసులు: పది, ఉల్లిపాయ: ఒకటి, పచ్చిమిర్చి: రెండు, కరివేపాకు రెబ్బలు: రెండు, అల్లం: చిన్న ముక్క, జీలకర్ర: చెంచా, వేయించిన పల్లీల పొడి: మూడు చెంచాలు, బియ్యప్పిండి: అరకప్పు, పెరుగు: కప్పు, వంటసోడా: చిటికెడు, కొత్తిమీర: కట్ట, నూనె: వేయించేందుకు సరిపడా, ఉప్పు: తగినంత.
తయారీ: బ్రెడ్‌ స్లైసుల అంచుల్ని తీసేసి, ముక్కల్లా కోసుకోవాలి. వీటిపైన నూనె తప్ప మిగిలిన పదార్థాలన్నీ ఒక్కొక్కటిగా వేసుకుని బాగా కలపాలి. తరువాత స్టౌమీద కడాయి పెట్టి నూనె వేయాలి. ఈ పిండిని కొద్దిగా తీసుకుని వడల్లా తట్టుకుని కాగుతోన్న నూనెలో వేసి ఎర్రగా వేయించుకుని తీసుకోవాలి. ఇదేవిధంగా మిగిలిన పిండీ చేసుకోవాలి. 

కావలసినవి: బ్రెడ్‌స్లైసులు: ఎనిమిది, పనీర్‌ ముద్ద: కప్పు, మైదా: రెండు టేబుల్‌స్పూన్లు, కొత్తిమీర: కట్ట, పాలు: ముప్పావుకప్పు, జీడిపప్పు: పావుకప్పు, అల్లం ముద్ద: చెంచా, మిరియాలపొడి: పావుచెంచా, పచ్చిమిర్చి: రెండు, కారం: పావుచెంచా,
ఉప్పు: తగినంత, దనియాలపొడి: చెంచా, నూనె: వేయించేందుకు సరిపడా.
తయారీ:ముందుగా బ్రెడ్‌స్లైసుల్ని మిక్సీలో పొడిలా చేసి ఓ గిన్నెలోకి తీసుకోవాలి. మైదాలో నీళ్లు పోసి జారు పిండిలా చేసుకోవాలి. కొద్దిగా బ్రెడ్‌పొడిని విడిగా తీసుకుని మిగిలిన దాంట్లో.. ఒక్కో పదార్థాన్ని వేసుకుంటూ అన్నింటినీ కలుపుకోవాలి. ఈ పిండిని కొద్దిగా తీసుకుని ఉండలా చేసి, మొదట బ్రెడ్‌పొడిలో, తరువాత మైదా మిశ్రమంలో అద్ది... కాగుతోన్న నూనెలో వేసి వేయించుకుని తీసుకోవాలి. మిగిలిన మిశ్రమాన్ని ఇలాగే చేసుకోవాలి.

కావలసినవి: బ్రెడ్‌స్లైసులు: అయిదు, వెన్న: రెండు చెంచాలు, వెల్లుల్లి తరుగు: చెంచా, పచ్చిమిర్చి ముక్కలు: చెంచా, ఉల్లికాడల తరుగు: రెండు టేబుల్‌స్పూన్లు, ఉల్లిపాయముక్కలు: పావుకప్పు, క్యారెట్‌, క్యాబేజీ, క్యాప్సికం తరుగు: అన్నీ కలిపి అరకప్పు, టొమాటోలు: రెండు, పావ్‌భాజీ మసాలా: చెంచా, ఉప్పు: తగినంత, టొమాటోసాస్‌: రెండు టేబుల్‌స్పూన్లు, కొత్తిమీర: కట్ట.
తయారీ: స్టౌమీద కడాయి పెట్టి వెన్న వేయాలి. అది కరిగాక వెల్లుల్లి, పచ్చిమిర్చి, ఉల్లికాడల తరుగు, ఉల్లిపాయ ముక్కలు వేయాలి. అన్నీ వేగాక కూరగాయ-టొమాటో ముక్కలు, తగినంత ఉప్పు వేసి వేయించాలి. టొమాటో ముక్కలు వేగాక పావ్‌భాజీ మసాలా, టొమాటోసాస్‌ వేసి కలపాలి. రెండు నిమిషాలయ్యాక బ్రెడ్‌ ముక్కల్ని వేసి అన్నింటినీ కలిపి కొత్తిమీర చల్లి స్టౌ కట్టేయాలి.