పాన్‌ బనారస్‌ వాలా..

ఆధ్యాత్మిక కేంద్రం బెనారస్‌ అదేనండీ వారణాసి వివిధ రకాల వంటకాలకీ ప్రసిద్ధి. ముఖ్యంగా పాన్‌లకి పెట్టింది పేరు. అమితాబ్‌ నటించిన ‘కైకే పాన్‌ బెనారస్‌ వాలా..’ ఎంత పెద్ద హిట్టో తెలిసిందేగా! పాన్‌తో పాటు అక్కడ దొరికే ఆ వంటకాలేంటో తెలుసుకుందాం రండి...

సబ్జి కచోరీ: వేడివేడి కచోరీలు వాటితో పాటే వేడి ఆలూకూర వారణాసి ప్రత్యేకం. ఒక్క కచోరీ తిన్నా చాలు కడుపు నిండిపోతుంది. అంత రుచిగా, పెద్దగా ఉంటాయివి.

చెనాదహీవడా: తీయని పెరుగులో ముంచిన వడలు.. జీలకర్రపొడి, నల్లుప్పు రుచితో భలే ఉంటాయి.

బట్టీచోకా: గోధుమపిండితో చేసిన చిన్నచిన్న ముద్దలని బొగ్గులమీద కాల్చి, వంకాయ కూరతో పెడుతుంటారు. వారణాసిలో ఏ మూలకెళ్లినా వేడివేడి బట్టీ చోకాలు దొరుకుతాయి.

బనారసీ తండాయి: చిక్కని పాలతో చేసిన లస్సీలు వివిధ రకాల పండ్ల ఫ్లేవర్లతో దొరకడం ఈ లస్సీల ప్రత్యేకం.

చూడా మటర్‌: అటుకులని వేయించి, పచ్చి బఠాణీలతో చేసే వంటకం ఇది. ఇంగువ, మిరియాలపొడి వేసి చేసే ఈ వంటకాన్ని పర్యటకులు చాలా ఇష్టంగా తింటారు.