చల్లటి చలిలో వెచ్చటి ‘కాంగ్‌షోయీ’

ఈ కాలంలో మణిపుర్‌ చలికి గజగజలాడుతుంది. ఇలాంటి చల్లటి చలిలో వెచ్చటి కాంగ్‌షోయీవాతావరణంలో వాళ్లు వెచ్చగా ‘కాంగ్‌షోయీ’ సూప్‌ తాగుతుంటారు. ఇదక్కడ చాలా ప్రసిద్ధం. కాంగ్‌షోయీ పదానికి మేళవింపు లేదా కలగలపడం అనే అర్థాలున్నాయి. ఆయా కాలాల్లో దొరికే కూరగాయలను కలగలిపి చేస్తారు కనుక ఆ పేరు వచ్చింది. ఇంతకీ దీన్నెలా చేస్తారంటే.. బంగాళదుంపల చెక్కు తీసి ముక్కలుగా కోసుకోవాలి. ఉల్లి, టొమాటోలు, పచ్చి మిరపకాయలు, బచ్చలి కూరలను తరగాలి. అల్లం, వెల్లుల్లి నూరుకోవాలి. వీటికి పచ్చి బఠాణీలను జతచేసి ఉడికించాలి. తర్వాత బచ్చలి తరుగు, ఉప్పు వేయాలి. కొంచెం ఎక్కువే నీళ్లు పోసి సూప్‌లా చేసుకోవాలి. ఎంతో సులువుగా తయారయ్యే ఈ వంటకం అద్భుతమైన రుచీ వాసనలతో అదిరిపోతుంది. మంచి పోషకాహారం కూడా. ఇవే కూరగాయలు వాడాలనే నియమం లేదు. అందుబాటులో ఉన్నవాటిల్లో నచ్చినవాటితో చేయొచ్చు. మనం దోస, చిక్కుడు, టొమాటో, వంకాయ, చిలకడదుంప, ములక్కాయలతో కలగూరగంప చేసుకుంటాం కదా! అలాగే మణిపుర్‌ వాసులకు కాయగూరలతో కాంగ్‌షోయీ సూప్‌ చేసి, ఇష్టంగా సేవిస్తారు. ఇది వెచ్చదనాన్ని ఇవ్వడమే కాదు, రోగనిరోధక శక్తినీ పెంచుతుంది.