ఎండ నుంచి రక్షగా!

ఎండలు ఎంతలా మండిపోతున్నా మనం బయటకు వెళ్లి తీరాల్సిందే! అలా వెళ్లేటప్పుడు వాటర్‌ బాటిల్‌ని తీసుకెళ్తున్నారా? అందులో ఉత్తనీరుని కాకుండా ఇవి కూడా జోడించండి. ఎండ నుంచి ఉపశమనంతోపాటు పోషకాలు కూడా అందుతాయి..

* నీటికి కొద్దిగా తేనె, నిమ్మరసం, దంచిన అల్లం కలిపితే... శరీరం నుంచి వ్యర్థాలు బయటకుపోవడంతోపాటు వ్యాధినిరోధకశక్తి పెరుగుతుంది. జీర్ణ సంబంధిత సమస్యలుంటే తొలగిపోతాయి.

* తరిగిన కీరాదోస ముక్కలు, కచ్చాపచ్చాగా దంచిన పుదీనా ఆకులు కలిపిన నీళ్లు తాగితే ఎండ నుంచి ఉపశమనంతోపాటు, శరీరంలోని మలినాలు బయటకు పోతాయి. బరువు తగ్గడంతోపాటు హైబీపీ నుంచి ఉపశమనం ఉంటుంది.

* సన్నగా తరిగిన పైనాపిల్‌ ముక్కలు, కొబ్బరిముక్కలు వీటిని నీటికి జోడించి రాత్రంతా ఫ్రిజ్‌లో ఉంచి తెల్లారి తాగి చూడండి. శరీరానికి మేలు చేసే కొవ్వులు అందడంతోపాటు... ఎండ నుంచి తక్షణ ఉపశమనం కలిగించే ఎలక్ట్రోలైట్లు అందుతాయి.

* దానిమ్మ గింజలు, దాల్చిన చెక్క వీటిని కలిపి తాగితే బీపీ తగ్గి.. వ్యాధినిరోధక శక్తి పెరుగుతుంది.

* సన్నగా చక్రాల్లా తరిగిన ఆరెంజ్‌ స్లైసులని నీళ్లలో కలిపి తాగితే బరువు తగ్గడంతోపాటు.. శరీరం ఎక్కువ సేపు తేమగా ఉంటుంది.