ఉల్లి పొడి..ఇలా చేయండి!

కూరలు, స్నాక్స్‌.. ఏవైనా సరే రొటీన్‌గా ఉంటే మనకు నచ్చవు. వాటినే ఎప్పటికప్పుడు కొత్తగా, మరింత టేస్టీగా చేసుకునేందుకు రకరకాల పొడులు మార్కెట్లో దొరుకుతున్నాయి. వాటిలో ఒకటి ఆనియన్‌ పౌడర్‌. కొన్ని వంటకాల్లో ఉల్లి తరుగు వాడటం కంటే ఈ పొడి అదనపు రుచిని ఇస్తుంది. ఎక్కువ ఖరీదు చెల్లించి రసాయనాలు కలిపిన పౌడర్‌ కొనితెచ్చుకోవడం కంటే ఇంట్లోనే ఇలా చేసుకోవచ్చు.

ముందుగా కిలో ఉల్లిపాయల పొట్టు తీసి, కడిగి, సన్నగా తరగాలి. లేదంటే వెజిటబుల్‌ స్లైసర్‌తో స్లైసెస్‌ చేయొచ్చు. వాటిని నాలుగు రోజులు ఎండబెట్టాలి. చల్లటి ప్రదేశంలో ఉండేవాళ్లు అవెన్‌లో 60-70 డిగ్రీల సెల్సియస్‌ వద్ద వేడి చేయొచ్చు. ఎండిన ఉల్లిపాయ ముక్కలను గ్రైండ్‌ చేసి మెత్తటి పొడి చేసుకుంటే సరిపోతుంది. ఈ ఆనియన్‌ పౌడర్‌ను తడిలేని సీసాలో భద్రపరచుకుంటే అవసరమైనప్పుడు వాడుకోవచ్చు.