ఒక్కసారి చేసుకుంటే ఏడాదంతా తాలింపు ఘుమఘుమ..

వేసవి వస్తే వడియాలు, ఒరుగులు చేస్తారు కదా! అలానే ఈ తాలింపు వడియాలని కూడా ప్రయత్నించండి. పేరు ఎప్పుడూ విన్నట్టుగా లేదు కదా! ఏడాదిపొడవునా అవసరం అయిన తాలింపుల కోసం చేసే వడియాలివి. ఒక్కసారి ఈ వడియాలు పెట్టుకుంటే ఏడాదంతా హైరానా పడాల్సిన అవసరం లేదు..

అరకిలో ఉల్లిపాయముక్కలకి.. మూడు చెంచాల చొప్పున ఆవాలు, జీలకర్ర, మెంతులు వేసుకోవాలి. మినపప్పు ఐదుచెంచాల వరకూ వేసుకోవచ్చు. తగినంత పసుపు వేసి కలిపి పక్కన పెట్టుకోవాలి. మిక్సీ జార్‌లో ఒక కప్పు వెల్లుల్లిరెబ్బలు, తగినంత ఉప్పు వేసి కచ్చాపచ్చాగా మిక్సీ పట్టుకోవాలి. ఈ మిశ్రమాన్ని ఉల్లిపాయముక్కల్లో వేసి కలిపి రాత్రంతా పక్కన పెట్టేయాలి. మరుసటి రోజు ఎండలో పెట్టి రోజంతా వదిలేయాలి. కాస్త తడి పొడిగా ఉన్నప్పుడు వీటిని ఉండలుగా చుట్టుకుని మంచి ఎండలో వారం పదిరోజులు ఎండబెట్టుకోవాలి. ఆ తర్వాత తీసి డబ్బాలో దాచుకుంటే ఏడాదిపొడవునా తాలింపులకోసం వీటిని వాడుకోవడమే.