ఒక్క పథకమైనా నడిచిందా?

రూ.8 లక్షల కోట్ల అప్పుతో

అన్న క్యాంటీన్‌ వాహనాన్ని ప్రారంభిస్తున్న అశోక్‌గజపతిరాజు

విజయనగరం అర్బన్‌, న్యూస్‌టుడే: తమిళనాడులో ప్రభుత్వం మారినా అమ్మా క్యాంటీన్లు కొనసాగాయని తెదేపా పొలిట్‌బ్యూరో సభ్యుడు పూసపాటి అశోక్‌గజపతిరాజు తెలిపారు. రాష్ట్రంలో పేదల పథకాలు ఒక్కొక్కటిగా ఆపేస్తున్నారని, అందులో శ్రమజీవులకు భోజనం పెట్టే అన్న క్యాంటీన్లు ఒక్కటన్నారు. గురువారం బంగ్లాలో పార్టీ బొబ్బిలి నియోజకవర్గ ఇన్‌ఛార్జి బేబినాయన చేపట్టనున్న ఉచిత అన్న క్యాంటీన్‌ సంచార వాహనాన్ని ఆయన ప్రారంభించారు.  రాష్ట్ర ప్రభుత్వం చేసిన రూ.8 లక్షల కోట్ల అప్పుతో ఒక్క పథకమైనా నడిచిందా? అని ప్రశ్నించారు. విద్యుత్తు మీటరు మారుతున్నట్లు ప్రతి నిమిషానికి అప్పు పెరుగుతుందని ఎద్దేవా చేశారు. రూ.కోట్ల అప్పులు ఎక్కడికి పోతున్నాయో దేవుడికే తెలియాలన్నారు. అనంతరం అశోక్‌ పుట్టినరోజును పురస్కరించుకుని పేర్లవారి వీధిలో చెవిటి, మూగ పాఠశాలలో ఏడాది పాటు అయిదుగురు విద్యార్థుల దత్తత నిమిత్తం రూ.30 వేలు, ప్రేమ సమాజానికి రూ.20 వేల చెక్కును బేబినాయన అందజేశారు. కార్యక్రమంలో అదితి గజపతిరాజు, తెంటు లక్ష్మునాయుడు, నాయకులు పాల్గొన్నారు.