మంత్రి సురేష్‌కు తప్పిన ప్రమాదం

ఈనాడు డిజిటల్‌, విశాఖపట్నం: రాష్ట్ర పురపాలక శాఖ మంత్రి ఆదిమూలపు సురేష్‌కు త్రుటిలో ప్రమాదం తప్పింది. జీ20 సన్నాహక సదస్సుల నేపథ్యంలో విశాఖ ఆర్కే బీచ్‌లో ఏర్పాటు చేసిన మారథాన్‌ను ఆదివారం మంత్రులు విడదల రజిని, ఆదిమూలపు సురేష్‌, గుడివాడ అమర్‌నాథ్‌ ప్రారంభించారు. అక్కడే ఓ ప్రైవేటు సంస్థ ఆధ్వర్యంలో పారాగ్లైడింగ్‌ ఏర్పాటు చేశారు. నిర్వాహకుల ఆహ్వానం మేరకు మంత్రి సురేష్‌ పారాగ్లైడింగ్‌ చేయడానికి ప్రయత్నించారు. ఎగిరే సమయంలో వాతావరణం అనుకూలంగా లేకపోవడంతో ఓ పక్కకు ఒరిగిపోయింది. అప్రమత్తమైన నిర్వాహకులు మోటార్‌ను నిలిపివేశారు. నేలపై ఉన్న సమయంలోనే ఈ ఘటన జరగడంతో మంత్రికి ప్రమాదం తప్పింది. ఈ నేపథ్యంలో నిర్వాహకులపై కలెక్టర్‌ మల్లికార్జున ఆగ్రహం వ్యక్తం చేసినట్లు తెలిసింది. మరోవైపు టెండర్లు పిలవకుండా ఏకపక్షంగా ప్రైవేటు సంస్థకు అనుమతులు ఇవ్వడంపై విమర్శలు వస్తున్నాయి. ఈ విషయమై జిల్లా పర్యాటకశాఖ అధికారి శ్రీదేవిని సంప్రదించగా ముందుగానే పారాగ్లైడింగ్‌ ట్రయల్‌ రన్‌ చేశారని, వాతావరణం అనుకూలంగా లేకపోవడంతో ఈ ఘటన జరిగిందని తెలిపారు. గతంలో విశాఖ ఉత్సవ్‌ సమయంలో ఆ సంస్థ మూడు రోజులపాటు పారాగ్లైడింగ్‌ నిర్వహించిందని పేర్కొన్నారు.