బాపట్ల జిల్లాలో ప్రబలిన అతిసారం

తూర్పు పిన్నిబోయినవారిపాలెంలో 40 మంది బాధితులు

బాపట్ల, న్యూస్‌టుడే: బాపట్ల జిల్లాలోని తూర్పు పిన్నిబోయినవారిపాలెంలో అతిసారం ప్రబలింది. గడిచిన అయిదు రోజుల్లో సుమారు 40 మంది వాంతులు, విరేచనాలతో మంచాన పడ్డారు. బాధితులు బాపట్ల, కర్లపాలెం, గుంటూరులోని ప్రభుత్వ, ప్రైవేటు ఆసుపత్రుల్లో చికిత్స పొందుతున్నారు. ఇందులో పిన్నిబోయిన సుబ్బారావు పరిస్థితి విషమంగా ఉండటంతో రెండ్రోజుల క్రితం గుంటూరులో ఓ ప్రైవేటు ఆసుపత్రికి తరలించారు. అప్పికట్ల ప్రాథమిక ఆరోగ్య కేంద్రం ఆధ్వర్యంలో గ్రామంలో వైద్య శిబిరం ఏర్పాటు చేశారు. ఆరోగ్య సిబ్బంది, వైద్యాధికారులు బాధితుల వివరాలు సేకరించారు. ఓఆర్‌ఎస్‌ ప్యాకెట్లు పంపిణీ చేశారు. స్థానికులు తాగుతున్న నీటి నమూనాలు సేకరించి, పరీక్షల నిమిత్తం పంపినట్లు ఈవోపీఆర్డీ పులి శరత్‌బాబు తెలిపారు. మిరప, వరి కోతలకు వెళ్తున్న వారు ఎండ నుంచి ఉపశమనం కోసం కూల్‌డ్రింక్‌లు తాగి, సమయానికి తినకపోవడం వల్ల అతిసార వ్యాధి బారిన పడినట్లు వైద్యాధికారి ఉస్మాన్‌ ప్రాథమికంగా నిర్ధారించారు. రోగులు కోలుకునే వరకూ గ్రామంలో వైద్య శిబిరం నిర్వహిస్తామన్నారు. ఎవరికీ ప్రాణాపాయం లేదన్నారు. గ్రామంలో ప్రభుత్వ రక్షిత మంచినీటి పథకం ఒక్కటీ లేదు. దీంతో దాతలు సరఫరా చేసే ట్యాంకర్లు, ప్రైవేటు నీటి శుద్ధి కేంద్రాల నీటినే ప్రజలు తాగుతున్నారు.