తిరుమలలో వసంతోత్సవ వైభవం

తిరుమల, న్యూస్‌టుడే: శ్రీవారి సాలకట్ల వసంతోత్సవాల్లో భాగంగా రెండోరోజు సోమవారం ఉదయం శ్రీదేవి, భూదేవి సమేత శ్రీమలయప్ప స్వామి స్వర్ణ రథంపై కొలువుదీరి తిరుమాడ వీధుల్లో ఊరేగుతూ భక్తులను కటాక్షించారు. ఉదయం 8 నుంచి 10 గంటల వరకు అత్యంత వైభవంగా సాగిన స్వర్ణ రథోత్సవంలో వేల మంది భక్తులు పాల్గొన్నారు. అనంతరం స్వామివారిని వసంతోత్సవ మండపంలో వేంచేపు చేశారు. అక్కడ అర్చకులు అభిషేకాదులు నిర్వహించారు. వసంతోత్సవాల్లో చివరి రోజైన మంగళవారం శ్రీదేవి, భూదేవి సమేత శ్రీమలయప్ప స్వామివారితోపాటు శ్రీసీతారామలక్ష్మణ ఆంజనేయస్వామి ఉత్సవమూర్తులు భక్తులకు దర్శనమివ్వనున్నారు. ఉత్సవాల నేపథ్యంలో శ్రీవారి ఆలయంలో నిర్వహించాల్సిన పౌర్ణమి గరుడ సేవను తితిదే రద్దు చేసింది.

భక్తులకు నేరుగా సర్వదర్శనం: ఎస్‌ఎస్‌డీ టోకెన్లు లేకుండా సోమవారం సాయంత్రం క్యూ లైన్లలో వచ్చిన భక్తులకు నేరుగా శ్రీవారి దర్శనం లభించింది. వైకుంఠం క్యూకాంప్లెక్స్‌-2లోని కంపార్ట్‌మెంట్లలో వేచిఉన్నవారికి కొన్ని గంటల్లోనే శ్రీవారి దర్శనం లభిస్తోందని తితిదే తెలిపింది.