అయిదేళ్లు చాల్లేదా..జగన్‌?

ఈనాడు, నెల్లూరు: మైనార్టీల సంక్షేమానికి పెద్దపీట వేస్తున్నామని పదే పదే చెబుతున్న వైకాపా ప్రభుత్వం.. వారి పిల్లల కోసం నిర్మించిన గురుకుల పాఠశాల భవనాన్ని మాత్రం పట్టించుకోలేదు. కేవలం 20% పనులు చేస్తే భవనం అందుబాటులోకి వచ్చే వీలున్నా.. దాన్ని వదిలేసింది. నెల్లూరు రూరల్‌ పరిధిలోని అక్కచెరువుపాడులో తెదేపా ప్రభుత్వ హయాంలో మైనారిటీ గురుకుల పాఠశాల భవనం నిర్మించారు. రూ.19 కోట్లు వెచ్చించి డైనింగ్‌ సముదాయం, అధ్యాపకుల గదులు, హాస్టల్‌ సముదాయం పనులు 80 శాతం పూర్తి చేశారు. వైకాపా అధికారంలోకి వచ్చాక దానిలో ఒక్క పనీ చేయలేదు. పిల్లలు అద్దె భవనంలో విద్యాభ్యాసం చేస్తున్నారు. అద్దె భవనం శిథిలావస్థకు చేరినా పట్టించుకోకుండా దానికే నెలకు రూ.1.10 లక్షల అద్దె చెల్లించడం గమనార్హం.